Yoshwa 14 - Livulu lya Shukulu Kalunga

Vapangezela mutambela wa mu kangombe ka yambi ya Ndonga ya Yondau

¹ Eyi ikeyo mitambela ivatambwile vaIsalele mu lifuti lya Kanana kupwa vushwana vwavo. Elyazale muka-kukombelela, na Yoshwa muna Nune, na vantwama va vikota vya miyati ya vaIsalele vakevo vavapangezeleleyo.

² Ngecivene, vushwana vwavo vavutele n̄ela ku miyati ije itanu na iwana na litambelo, ije yakele mu kangombe ka yambi ya Yondau, ngwe muje mwashikile Shukulu Kalunga kuli Mosesa.

³ Mosesa walivangele kwana vushwana ku miyati ije ivali na litambelo vaje vakele mu ngangela musambwa ya Yondau, oloni kaanene vushwana akati ka vaLevi vwai,

⁴ omwo vana va Yosefa vapwile miyati ivali, Manase, na Efalime. Oloni kukwakele mutambela uvaanene kuli vaLevi mu lifuti, kuvanga vinganda lika muje muvakele, na kuje kwakulila vimuna vavo na matanga avo.

⁵ Co vanu va Isalele valipangezelele lifuti ngwe muje mwashikile Shukulu Kalunga kuli Mosesa.

Hevelone vayana kuli Kalembi

⁶ Asinoni vanu va ku muyati wa Yunda vezile kuli Yoshwa ku Ngilingale. Umo wa ali vakevo wapwile Kalembi muna Njefune kaKeni, wendekele kuli ikeye ngwendi, “Yove wazivuka vije vyendekele Shukulu Kalunga mu Kandeshe Mbaleneya kuli Mosesa munu wa Njambi ali yove nange.

⁷ Omo yange njakele na myaka makumi awana, co ngamba ya Shukulu Kalunga Mosesa wanjitumine kutunda ku Kandeshe Mbaleneya kwija nakunenga lifuti lino. Co njatwalele vukaleo vunjamwene na mesho ange.

⁸ Oloni vaje vanu njaile navo, nameme vakevo vazivisile lyova vanu vetu, oloni yange njakulaelele nakwononoka Shukulu Kalunga Njambi yetu na mbunge yange yoshe.

⁹ Ngecivene, Mosesa walisingile a litangwa lije ngwendi, ‘Mwa vushunga mu lifuti lije muwalyatele mendi ove likapwa vushwana vwove na vatekulwila vove ku myaka yoshe, omwo unononoka Shukulu Kalunga Njambi yetu na mbunge yove yoshe.’

¹⁰ Co ololo kenga, Shukulu Kalunga nanjinyungu. Njinayoyo myaka makumi awana na myaka itanu tunde a simbu ije Shukulu Kalunga wendekele kuli Mosesa majwi awa, omo vaIsalele vakele nakwendangana mu mambo. Ngecivene, ololo kenga njili na myaka makumi atanu na atatu na myaka itanu.

¹¹ Co na ku litangwa lya lelo njicili na nzili ngwe a simbu ije vene Mosesa wanjitumine. Njicili na nzili yakulwa nzita.

¹² Ngeconi ololo, njane lifuti lya malundu lije lyanjikulaesele Shukulu Kalunga a litangwa lije omo yange na vanu vange twatwalele vukaleo. Co a simbu ije twakulekele ngeci uje muyati wa makisi-kisi uvatumbula ngwavo vaAnakime vakele kuje mu vinganda vya vivumbe vyavilaja. Nga Shukulu Kalunga akakala amo nange, co njikavasheka, ngwe muje mwendekele Shukulu Kalunga.”

¹³ Asinoni Yoshwa wavezikisile Kalembi muna Njefune, co wamwanene nganda ya Hevelone kupwa vushwana vwendi.

¹⁴ Ngecivene, Hevelone na lelo lino yapwa vushwana vwa naanga ya Kalembi muna Njefune kaKeni, omwo ikeye wakulaelele nakwononoka Shukulu Kalunga Njambi ya Isalele na mbunge yendi yoshe.

¹⁵ Co a simbu yalaja, Hevelone vaitumbwile ngwavo nganda ya Alemba. (Alemba ikeye wapwile kaAnakime, munalume watuvakanene vaAnakime voshe.) Co kwakele kwoloka mu lifuti.