Yoshwa 13 - Livulu lya Shukulu Kalunga

Lifuti lyasalele kulitambula

¹ Yoshwa te nakuluvala manene. Shukulu Kalunga wamulekele ngwendi, “Yove ololo unakuluvala manene, oloni kucili mitambela yaingi yasalako ngeci uyitambule,

² mitambela yoshe ya Filisitiya na Ngeshule,

³ na mitambela yoshe ya Avime ku mbwela. (Lifuti lyakutunda ku muna ndonga Shihole, ku nginga ya Ingito, nakweta ku kunto ku nginga ya ku Ekelone, lifuti eli lyoshe lyapwile lya vaKanana. Vimyene va vaFilisitiya vakele ku Ngaza, na Ashendonde, na Ashekelone, na Ngate, na Ekelone.)

⁴ Kucili mitambela yaingi ya vaKanana, na Meala ije yapwa ya vaSindone, kweta na ku Afeke ku nginga ya vaAmoli,

⁵ na lifuti lya vaNgembale, na mu ngangela ya Lembanone mwoshe, kutunda ku Mbalengande, ije yakala mu mbwela ya Munkinda wa Helemone, nakweta ku Ngila ya Hamate.

⁶ Kukumbasanako na mitambela yoshe ya vaSindone, vaje vakala mu mitambela ya malundu mukati ka Minkinda ya Lembanone nakweta ku Miselefote Maime. Njikashekamo vanu voshe ku mesho a vanu va Isalele. Unapande kupangezela lifuti akati ka vaIsalele, kupwa vushwana vwavo ngwe muje njakushikile ngeci ulingemo.

⁷ Ngecivene, ololo, pangezela lifuti eli akati ka miyati ije yasaleleo, itanu na iwana na litambelo lya muyati wa Manase, ngeci lipwe vushwana vwavo.”

Kupanga lifuti lya mu ngangela ya Ndonga ya Yondau

⁸ Miyati ya Luvena, na Ngande na litambelo limo lya muyati wa Manase vatambwile lifuti lije lyavaanene Mosesa ngamba ya Shukulu Kalunga, likelyo lyakele mu ngangela ya Ndonga ya Yondau.

⁹ Mutambela wavo washangumukilile ku Aloele ku shongo ya Cana ca Ndonga ya Alenone, na nganda ije yakele mukati ka cana cije nakukumbasanako cana coshe kutunda ku Mendeva nakweta ku Ndimbone.

¹⁰ Lifuti lyetele na ku nginga ya vaAmoni kukumbasanako vinganda vyoshe vya Sihone mwene wa vaAmoli, uje washwanene ku Heshevone.

¹¹ Kukumbasanako na Ngilyande, na mitambela ya vaNgeshule, na vaMaka, na Munkinda woshe wa Helemone, na Mbashane yoshe kweta na ku Saleka.

¹² Kukumbasanako na vumwene vwoshe vwa Onge mu Mbashane, uje washwanene ku Ashetalote, na Endeleyi. Ikeye wapwile wakumanesela ku muyati wa vaLefaime. Mosesa wafungulwile vaje vanu, co wavashekele.

¹³ Nameme ngoco, vaIsalele kuvashekele vaNgeshule, na vaMaka embwe, oloni na lelo lino vacili nakukala mu Isalele.

¹⁴ Mosesa kaanene mutambela wa lifuti ku muyati wa vaLevi kupwa vushwana vwavo, kuvanga lika vin̄ombelo vya kwenyeka a mutula kuli Shukulu Kalunga Njambi ya Isalele, vikevyo vyapwile vushwana vwavo ngwe muje mwamushikile Shukulu Kalunga.

Mutambela waanene Mosesa kuli Luvena

¹⁵ Mosesa waanene mutambela wa lifuti ku muyati wa Luvena kupwa vushwana vwavo.

¹⁶ Co lifuti lyavo lyashangumukilile ku Aloele kutwala kumukulo wa cana ca Ndonga ya Alenone, na nganda yakele mukati ka cana cije, kukumbasanako na lifuti lyakushalama nakweta ku Mendeva.

¹⁷ Wakumbasaneneko na Heshevone na vinganda vyoshe vya aje akushalama, Ndimbone, na Mbamote Mbale, na Mbete Mbalemeone,

¹⁸ na Njahaze, na Kendemote, na Mefate,

¹⁹ na Kilyatehaime, na Simbema, na Zelete-Shahale a lilundu lya a cana,

²⁰ na Mbete Peole, nakushelumuka ku Munkinda wa Pisenga, na Mbete Njeshimote,

²¹ na vinganda vyoshe vya mu cana, na vumwene vwoshe vwa Sihone mwene wa vaAmoli, uje washwanene ku Heshevone. Mosesa wamufungulwile amolika na vaka-kushwana va mu Mindyani, Evi, na Lekeme, na Zule, na Hule, na Lemba, voshe vakele mu lifuti lya Mwene Sihone.

²² Co akati ka vanu vaje vavatsiile vaIsalele akele Mbalame muna Mbeole muka-kutaha.

²³ Nginga ya muyati wa Luvena yapwile Ndonga ya Yondau na cikulo cayo mu kangombe ka yambi. Co vinganda evi na membo vyapwile vushwana vwa Luvena.

Mutambela waanene Mosesa kuli Ngande

²⁴ Mosesa waanene lalo mutambela wa lifuti ku muyati wa Ngande kupwa vushwana vwavo.

²⁵ Co nginga yapwile Njazele na vinganda vyoshe vya Ngilyande, na litambelo lya lifuti lya vaAmoni kweta na ku Aloele, ije yakala mu ngangela ya Lamba.

²⁶ Mutambela wavo washangumukilile ku Heshevone kweta ku Lamate Mizipa, na Mbetonime, nakutunda ku Mahanaime nakweta ku nginga ya ku Londembale,

²⁷ na mu Cana ca Yondau kukumbasanako Mbete Halame, na Mbetenimela, na Sukote, na Zafone, likelyo lifuti lyapwile lya vumwene vwa Mwene Sihone wa ku Heshevone. Nginga yavo ya mu kangombe ka yambi yapwile Ndonga ya Yondau kweta ku kunto ya Lishali lya Ngalileya.

²⁸ Evi vikevyo vinganda na membo aje aanene Mosesa ku muyati wa Ngande kupwa vushwana vwavo.

Mutambela wa mu ngangela waanene Mosesa ku litambelo lya muyati wa Manase

²⁹ Mosesa waanene mutambela wa lifuti ku litambelo lya muyati wa Manase kupwa vushwana vwavo.

³⁰ Mutambela wavo washangumukilile ku Mahanaime kukumbasanako Mbashane, lifuti lyoshe lya Onge mwene wa ku Mbashane, amo na membo oshe aje makumi atanu na limo a ku Njaile mu Mbashane.

³¹ Kukumbasanako litambelo lya Ngilyande, amo na Ashetalote, na Endeleyi, mitwe ya vinganda vya vumwene vwa Onge wa ku Mbashane. Vyoshe evi Mosesa wavyanene ku naanga ya Makile muna Manase.

³² Ovu vukevwo vushwana vwapangezelele Mosesa omo wakele mu vyana vya Mowavi musambwa ya Ndonga ya Yondau mu ngangela ya Yeliko.

³³ Oloni Mosesa kaanene mutambela umo kupwa vushwana vwa muyati wa vaLevi, omwo ikeye wavalekele ngeci Shukulu Kalunga Njambi ya Isalele ikeye akapwa vushwana vwavo.