Yoshwa 12 - Livulu lya Shukulu Kalunga

Vimyene vafungulwile Mosesa

¹ Vanu va Isalele vafungulwile nakutambula lifuti lya mu ngangela musambwa ya Ndonga ya Yondau, kutunda ku Cana ca Alenone nakulamata ku Cana ca Yondau nakweta ku kunto ku Munkinda wa Helemone. Co vakevo vafungulwile vimyene vavali.

² Umo wapwile Sihone, mwene wa vaAmoli uje washwanene ku Heshevone. Ku vushwana vwendi wakumbasaneneko na litambelo lya Ngilyande, kutunda ku nginga ya Aloele na ku Cana ca Ndonga ya Alenone na ku nganda ili mukati ka cana, nakweta ku Ndonga ya Njavoke, eyi ikeyo nginga ya vaAmoni,

³ na Cana ca Yondau kutunda ku Lishali lya Ngalileya mu ngangela ya Mbete Njeshimote ku mbwela ya Lishali Lya Kutsa, co nginga yaile na ku vushelumukilo vwa Munkinda wa Pisenga.

⁴ Co vaIsalele vafungulwile lalo Mwene Onge wa ku Mbashane, uje wasaleleo ku muyati wa vaLefaime. Ikeye washwanene ku Ashetalote na Endeleyi.

⁵ Co ku vumwene vwendi wakumbasaneneko Munkinda wa Helemone, na Saleka, na Mbashane yoshe nakweta ku vinginga vya Ngeshule, na Maka, na litambelo lya Ngilyande, nakweta ku nginga ya Sihone mwene wa ku Heshevone.

⁶ Vimyene ava vavali wavafungulwile Mosesa na vanu va Isalele. Mosesa ngamba ya Shukulu Kalunga waanene lifuti lyavo ku miyati ya Luvena na Ngande na litambelo lya muyati wa Manase, kupwa vushwana vwavo.

Vimyene vafungulwile Yoshwa

⁷ Yoshwa na vanu va Isalele vafungulwile vimyene voshe vaje vakele mu kangombe ka yambi ya Yondau, kutunda ku Mbalengande mu cana ca Lembanone nakweta ku Munkinda wa Halake mu mbwela kuyehi na Endome. Yoshwa wapangezelele lifuti eli akati ka miyati ya Isalele kupwa vushwana vwavo ngwe ku miyati yavo.

⁸ Co wavapangezelele lifuti lya malundu, na lifuti lya ku vushelumukilo vwa malundu mu kangombe ka yambi, na cana ca Yondau na kuje ku vushelumukilo vwa malundu, na kuje kwakungulumuka mu ngangela, amo na lifuti lyakuma lya mu mbwela. Lifuti eli likelyo lyapwile lya vaHiti, na vaAmoli, na vaKanana, na vaPelezi, na vaHivi, na vaNjevushi.

⁹ Vanu va Isalele vafungulwile vimyene va vinganda evi, Yeliko, na Ayi (kuyehi na Mbetele),

¹⁰ na Yelusalema, na Hevelone,

¹¹ na Njalemute, na Lakishe,

¹² na Engelone, na Ngezele,

¹³ na Ndembile, na Ngendele,

¹⁴ na Holame, na Alande,

¹⁵ na Limbena, na Andulame,

¹⁶ na Makenda, na Mbetele,

¹⁷ na Tapuwa, na Hefele,

¹⁸ na Afeke, na Lashalone,

¹⁹ na Mandone, na Hazole,

²⁰ na Shimelone, na Melone, na Akeshafe,

²¹ na Taanake, na Mengindo,

²² na Kendeshe, na Njokename (mu Kalemele),

²³ na Ndole (ku cikuma ca mema a kalunga), na Ngoime (mu Ngalileya),

²⁴ na Tileza. Vimyene voshe vapwile makumi atatu na umo.