Yoshwa 11 - Livulu lya Shukulu Kalunga

Yoshwa afungulula vimyene va ku kunto

¹ Omo Mwene Njavine wa ku Hazole wazivile muzimbu wakuhyana kwa vaIsalele, co watumine lijwi kuli Mwene Njombambe wa ku Mandone, na kuli vimyene va ku Shimelone, na Akeshafe,

² na kuli vimyene vaje vakele ku kunto ku lifuti lya malundu, na mu Cana ca Yondau ku mbwela ku Lishali lya Ngalileya, na lifuti lya ku vushelumukilo vwa malundu, na ku cikuma ca Mema a Kalunga a Menditelenyani kuyehi na Ndole.

³ Co watumine lalo lijwi kuli vaKanana vaje vakele mu ngangela na mu kangombe ka yambi ya Yondau, na kuli vaAmoli, na kuli vaHiti, na kuli vaPelezi, na kuli vaNjevushi vaje vakele mu lifuti lya malundu, na vaHivi lalo vaje vakele kwisi ya Munkinda wa Helemone mu lifuti lya Mizipa.

⁴ Co vezile na mashwalale vavo voshe, vapwile vavangi manene ngwe lishen̄avu lya ku cikuma ca mema a kalunga. Co vakele lalo na tuvalu vavangi na matemba.

⁵ Ngecivene, vimyene voshe vaje valipandakanene amo nakulwisa vaIsalele, co vatungile cilombo cavo ku Muna Ndonga Melome.

⁶ Co Shukulu Kalunga wendekele kuli Yoshwa ngwendi, “Kesi uvazivile lyova embwe, omwo imene a simbu ino vene njikamitsiilavo voshe. Mukateta makaana a tuvalu twavo nakwenyeka matemba avo.”

⁷ Ngecivene, Yoshwa na mashwalale vendi voshe vakasumwine vaje vitozi nakuvalwisa kuje ku Muna Ndonga Melome.

⁸ Shukulu Kalunga wavakundikile ku mavoko a vaIsalele, co vaIsalele vavalwisile nakuvashekela kukunto ku Miselefote Maime, na Sindone, co vetele kungangela na ku cana ca Mizipa. Ngecivene, nzita yakeleko noo vavatsiile voshe.

⁹ Yoshwa walingile kuli vakevo ngwe muje mwamushikile Shukulu Kalunga, co watetangele makaana a tuvalu twavo nakwenyeka matemba avo.

¹⁰ Asinoni Yoshwa welukile, co wafungulwile Hazole nakutsiya mwene wamwo. A simbu ije Hazole yapwile nganda yakama manene ku vumwene vwoshe.

¹¹ Co vatsiile nakunyongesa vanu voshe vaje vakele muje, naumo wai wasalelemo na mwonyo, co venyekele nganda.

¹² Yoshwa wafungulwile vinganda vyoshe vije na vimyene vamwo, co vatsiile nakunyongesa vanu voshe vaje vakele muje ngwe muje mwashikile Mosesa ngamba ya Shukulu Kalunga.

¹³ Oloni vaIsalele kuvenyekele vinganda vije vatungile akulunduka, kuvanga lika Hazole, ikeyo yenyekele Yoshwa.

¹⁴ Vanu va Isalele vambatele vyoshe vije vapukwile mu vinganda evi amo na vimuna. Vanyongesele vanu voshe, naumo wai wasalelemo na mwonyo.

¹⁵ Shukulu Kalunga washikile mashiko awa ngamba yendi Mosesa, co Mosesa nendi lalo washikile Yoshwa, co Yoshwa waononokele. Ngecivene, Yoshwa walingile vyuma vyoshe vije vyashikile Shukulu Kalunga kuli Mosesa.

Yoshwa afungulula lifuti lyoshe

¹⁶ Ngecivene, Yoshwa wafungulwile lifuti lyoshe na lifuti lya malundu, na lifuti lya ku vushelumukilo vwa malundu, na mitambela ya ku kunto na ku mbwela, na mutambela woshe wa Ngoshene, na lifuti lyakujeneka mema mu mbwela, kweta na ku Cana ca Yondau.

¹⁷ Co Yoshwa wafungulwile vimyene voshe va mu mitambela ije nakuvatsiya, kutunda ku Munkinda wa Halake mu mbwela kuyehi na Endome, kweta na ku Mbalengande ku kunto, mu cana ca Lembanone ku mbwela ya Munkinda wa Helemone.

¹⁸ Yoshwa walwile simbu yakama na vimyene vaje voshe, oloni wavafungulwile nakuvatsiya.

¹⁹ Nganda ya Ngimbiyone lika vakevo valombele kwoloka kuli vanu vaIsalele, muje mwakele vaHivi. Oloni vaIsalele vafungulwile miyati yoshe ya vanu,

²⁰ omwo Shukulu Kalunga wakaluwisile vimbunge vyavo vyakulwisa vaIsalele, ngeci vavanyongese nakuvahisa na cihiso cakama nakujeneka kuvazivilako mema ku mbunge, ngwe muje mwashikile Shukulu Kalunga kuli Mosesa.

²¹ A simbu ije Yoshwa waile nakunyongesa muyati wa makisi-kisi vaje vavatumbwile ngwavo vaAnakime, vaje vakele mu lifuti lya malundu mu Hevelone, na Ndembile, na Anambe, na mu malundu a lifuti lya Yunda mwoshe na mu lifuti lya malundu lya Isalele lyoshe. Co Yoshwa wavanyongesele voshe amo na vinganda vyavo.

²² KaAnakime naumo wai wasalele mu lifuti lya Isalele, kuvanga vavandondo lika vasalele mu Ngaza, na mu Ngate, na mu Ashendonde.

²³ Ngecivene, Yoshwa wafungulwile lifuti lyoshe ngwe muje mwashikile Shukulu Kalunga kuli Mosesa. Yoshwa walyanene kuli vaIsalele kupwa vushwana vwavo, co wavapangezelelelyo mu mitambela yavo na mu miyati yavo. Co kukwakele nzita.