Yoshwa 10 - Livulu lya Shukulu Kalunga

Kufungulula vaAmoli

¹ Mwene Andonizendeke wa mu Yelusalema wazivile ngeci Yoshwa nafungulula nakunyongesa Ayi, co natsii mwene wamwo, ngwe muje mwalingile na Yeliko na mwene wamwo. Co ikeye lalo wazivile ngeci vanu va ku Ngimbiyone vanalingi cikumiiyo na vaIsalele, co ololo vanatungu akati kavo.

² Co vanu va mu Yelusalema vazivile lyova lyakama manene a lutsimo olu omwo Ngimbiyone yapwile nganda yakama ngwe vinganda vikwavo vije vyakele na mwene, ikeyo yapwile yakama manene kutuvakana Ayi, co na vanalume vamwo vapwile vaka-kulwa na nzili.

³ Ngecivene, Andonizendeke mwene wa mu Yelusalema watumine lijwi kuli Mwene Hohame wa ku Hevelone, na kuli Mwene Pilame wa ku Njalemute, na kuli Mwene Njafiya wa ku Lakishe, na kuli Mwene Ndembile wa ku Engelone ngwendi,

⁴ “Ijeni mwakunjikwase kulwa na vaNgimbiyone, omwo vanu vakwo vanalombo kwoloka kuli Yoshwa na kuli vaIsalele.”

⁵ Ngecivene, vimyene vaje vatanu va vaAmoli, mwene wa ku Yelusalema, na mwene wa ku Hevelone, na mwene wa ku Njalemute, na mwene wa ku Lakishe, na mwene wa ku Engelone valipandakanene amo kulwa nzita, co vazengelekele vaNgimbiyone nakuvalwisa.

⁶ Co vanalume va ku Ngimbiyone vatumine lijwi kuli Yoshwa ku cilombo ca ku Ngilingale ngwavo, “Shukulu, kesi utukengese nima yetu vangamba vove embwe! Zambulako wakutukwase! Twamene! Vimyene voshe va vaAmoli vanalikumbasana amo nakutulwisa!”

⁷ Ngecivene, Yoshwa watundile ku Ngilingale amo na mashwalale vendi na vanalume voshe vaka-nzili.

⁸ Co Shukulu Kalunga wendekele kuli Yoshwa ngwendi, “Kesi uvazivile lyova embwe omwo njinavakundika laja ku mavoko ove. Naumo wai wa ali vakevo akasa kwimana nove nakukulwisa.”

⁹ Yoshwa na mashwalale vendi vendele vutsiki vwoshe kutunda ku Ngilingale nakweta ku Ngimbiyone, co vakasumwine vaAmoli nakuvalwisa.

¹⁰ Ngecivene, Shukulu Kalunga wauya-wuyisile vaAmoli ku mesho a vaIsalele. Co vaIsalele vatsiile vaAmoli ku Ngimbiyone, asinoni vavashekelele ku ngila yakwita ku lilundu ku Mbete Holone, co vatsiile vanu vavangi nakuvasheka nakuvetesa ku mbwela ya ku Azeka, na ku Makenda.

¹¹ Omo vaAmoli vatewele kushelumukila mu ngila ya Mbete Holone kutunda ku nzita ya vaIsalele, co Shukulu Kalunga wavanyokeselele nyonzi yakama ya mamanya a ngila yoshe nakweta ku Azeka. Vavangi vatsile ku nyonzi ya mamanya kutuvakana vaje vavatsiile vaIsalele.

¹² A litangwa lije Shukulu Kalunga waanene nzili vaIsalele yakufungulula vaAmoli, Yoshwa wendekele kuli Shukulu Kalunga ku mesho a vaIsalele ngwendi, “Ove litangwa, imana akamwa ya Ngimbiyone, nove ngonde, imana akamwa ya Cana ca Ainjalone.”

¹³ Ngecivene, litangwa lyemanene, na ngonde yemanene, kuvyasele kushwenya noo muyati wa Isalele vafungulwile vitozi vavo. Evi vavisoneka mu Livulu lya Njashale ngwavo litangwa lyemanene lyoshe lyamutunu kulyalaukile.

¹⁴ Co nambe kunima, nambe kulutwe, kukukakala lalo litangwa lyakulifwa ngwe eli lyai, omo Shukulu Kalunga wononokele ku lijwi lya munu. Co mwa vushunga vene Shukulu Kalunga walwililile vaIsalele!

¹⁵ Munima yevi, Yoshwa na mashwalale vendi velukile ku cilombo ca ku Ngilingale.

Yoshwa afungulula vimyene vatanu va vaAmoli

¹⁶ Oloni vaje vimyene vatanu, vatewele vakavandele mu linzenzengoma lya ku Makenda.

¹⁷ Vanu vamo vavawanene, co valekele Yoshwa ngwavo, “Vaje vimyene vatanu vanavanda mu linzenzengoma lya ku Makenda.”

¹⁸ Co Yoshwa wendekele ngwendi, “Andumwineniko mamanya akama ku cikolo ca linzenzengoma, co akeniko vaka-kunyunga.

¹⁹ Oloni yeni kesi mwimane, kaveni vitozi veni ngeci muvatsiye, kesi muvatave velukile lalo ku vinganda vyavo omwo Shukulu Kalunga Njambi yeni navakundika ku mavoko eni.”

²⁰ Ngecivene, Yoshwa na mashwalale va vaIsalele vatsiile vaAmoli, nameme ngoco vamo vavandele mukati ka vivumbe vya vinganda vyavo, co kuvavatsiile.

²¹ Co vanu voshe velukile mwamuvwa kuli Yoshwa ku cilombo ca ku Makenda. Naumo wai waningwile nameme muningu ali vaIsalele.

²² Asinoni Yoshwa wendekele ngwendi, “Shokololeni ku cikolo ca linzenzengoma, tuwiseni vaje vimyene vatanu muvanene kuli yange.”

²³ Ngecivene, valingile ngacije, vatuwisile vaje vimyene vatanu mu linzenzengoma, mwene wa ku Yelusalema, na mwene wa ku Hevelone, na mwene wa ku Njalemute, na mwene wa ku Lakishe, na mwene wa ku Engelone,

²⁴ co omo vatuwisile vaje vimyene vatanu mu linzenzengoma, vavatwalele kuli Yoshwa. Asinoni Yoshwa wasanene vanalume voshe va Isalele nakushika vamyata vaje vaile navo ku nzita ngeci valyate a mikoshi ya vaje vimyene. Co valingile ngacije.

²⁵ Co Yoshwa wendekele kuli vamyata vendi ngwendi, “Kesi muzive lyova nambe kujujuka embwe. Koleseni nakusimpa omwo eci cikeco cakalinga Shukulu Kalunga kuli vitozi veni voshe vaje vamukalwa navo.”

²⁶ Asinoni Yoshwa watsiile vaje vimyene vatanu nakuvatapa mitwe, wavashukikile a miti itanu, co mivila yavo yakele aje noo cingwezi.

²⁷ Omo litangwa lyatokele, Yoshwa washikile ngeci vatundise mivila yavo nakuyumbila mu linzenzengoma muje muvavandele akulivanga. Co vandumwinineko mamanya akama ku cikolo ca lije linzenzengoma, na lelo lino anga muvacili.

Yoshwa afungulula mitambela ikwavo ya vaAmoli

²⁸ A litangwa lije vene Yoshwa walwile nakufungulula Makenda na mwene wamwo. Co watsiile vanu voshe vakele muje mu nganda, naumo wai wasalelemo na mwonyo. Yoshwa walingile evi kuli mwene wa ku Makenda ngwe muje mwalingile kuli mwene wa ku Yeliko.

²⁹ Munima yevi, Yoshwa na mashwalale vendi vatundile ku Makenda, vaile ku Limbena nakulwa.

³⁰ Co Shukulu Kalunga waanene nzili kuli vaIsalele yakufungulula nganda eyi na mwene wayo, naumo wai wasalelemo na mwonyo. Yoshwa walingile evi kuli mwene wa ku Limbena ngwe muje mwalingile kuli mwene wa ku Yeliko.

³¹ Asinoni Yoshwa na mashwalale vendi vatundile ku Limbena, vaile ku Lakishe, vaizengelekele nakuyilwisa.

³² Ngecivene, Shukulu Kalunga waanene nzili kuli vaIsalele yakufungulula Lakishe a litangwa lyamucivali lya nzita, naumo wai vasezelemo na mwonyo, ngwe muje muvalingile lalo ku Limbena.

³³ Mwene Holame wa ku Ngezele wezile nakukwasa Lakishe, oloni Yoshwa wamufungulwile na mashwalale vendi, co naumo wai wasaleleo na mwonyo.

³⁴ Munima yevi, Yoshwa na mashwalale vendi vatundile ku Lakishe, vaile ku Engelone, vaizengelekele nakuyilwisa.

³⁵ Vafungulwile ije nganda a litangwa lije vene, co vatsiile vanu voshe va muje mu nganda ngwe muje muvalingile ku Lakishe.

³⁶ Munima yevi, Yoshwa na mashwalale vendi vatundile ku Engelone valamatele ku malundu nakuya ku Hevelone, co valwile navo.

³⁷ Co wafungulwile ije nganda nakutsiya mwene na vanu voshe va muje mu nganda na membo akwatako. Yoshwa wanyongesele vanu voshe vakele muje, naumo wai wasalelemo na mwonyo. Yoshwa walingile evi ngwe muje mwalingile ku Engelone.

³⁸ Asinoni Yoshwa na mashwalale vendi velukile ku Ndembile nakulwa navo.

³⁹ Wafungulwile ije nganda na mwene wayo na membo oshe akwatako. Co vanyongesele vanu voshe vakele muje, naumo wai wasalelemo na mwonyo. Yoshwa walingile ku Ndembile na mwene wayo ngwe muje mwalingile ku Hevelone na ku Limbena na vimyene va muje mu vinganda vivali.

⁴⁰ Yoshwa wahyanene lifuti lyoshe. Co wafungulwile lalo vimyene va mu lifuti lya malundu, na lifuti lyakungulumuka, na lifuti lya ku vushelumukilo vwa malundu lya mu kangombe ka yambi, na lifuti lyakujeneka mema mu mbwela, naumo wai wasalelemo na mwonyo, co wanyongesele voshe, ngwe muje mwashikile Shukulu Kalunga Njambi ya Isalele.

⁴¹ Co Yoshwa wavafungulwile kutunda ku Kandeshe Mbaleneya mu mbwela nakweta ku Ngaza kuyehi na cikuma ca Lishali lya Menditelenyani, na mitambela yoshe ya Ngoshene, na ku kunto ya Ngimbiyone.

⁴² Yoshwa wafungulwile vimyene voshe ava na mitambela yavo mu simbu imolika omwo Shukulu Kalunga Njambi ya Isalele, waamenene vaIsalele nakuvalwilako.

⁴³ Munima yevi, Yoshwa na mashwalale vendi velukile ku cilombo ca ku Ngilingale.