Yoshwa 1 - Livulu lya Shukulu Kalunga

Njambi ashika Yoshwa kufungulula Kanana

¹ Omo Mosesa ngamba ya Shukulu Kalunga natsi laja, Shukulu Kalunga wendekele kuli Yoshwa muna Nune mukwasi wa Mosesa ngwendi,

² “Ngamba yange Mosesa natsi, ngecivene, ololo livwaese, katuka yove na vanu va Isalele voshe, ngeci mujavuke Ndonga ya Yondau muye mu lifuti lije linjikavana.

³ Mutambela woshe umukalyata myanja yeni njinamyanawo ngwe munjalekele Mosesa.

⁴ Vinginga vyeni vikatunda mu mambo ku mbwela nakweta ku Minkinda ya Lembanone ku kunto, nakutunda ku Ndonga ya Yufuleti mu ngangela kutuvakana lifuti lya vaHiti, nakweta ku Lishali lya Menditelenyani mu kangombe ka yambi.

⁵ Naumo wai akakufungulula matangwa oshe akuyoya kwove. Simbu yoshe njikakala amo nove ngwe munjakele na Mosesa, kunjikakuseze ngoco, nambe kukukengesa nima embwe.

⁶ Kolesa nakusimpa omwo yove ukapwa ntwama ya vanu ava, ngeci vakashwane lifuti lije njalisingile na vakukulwila vavo kuvanalyo.

⁷ Oloni kolesa lika nakusimpa manene, unyunge mashiko oshe aje akushikile ngamba yange Mosesa. Kesi ukalimbulule nambe litambelo limo, ngeci ukavezike mwamuvwa kwoshe kuje kuukaya.

⁸ Livulu eli lya Mashiko lilave kutambekela simbu yoshe omo mukunguluka. Co lilongeselyo mutanya na vutsiki, ngeci wononoke vyuma vyoshe vije vivasonekamo. Co ukavezika nakukala mwamuvwa mukuyoya kwove.

⁹ Anuka vinjinakushiki ngeci ukolese nakusimpa! Kesi uzive lyova nambe kujujuka, omwo yange Kalunga Njambi yove, njili amo nove kwoshe kuukaya.”

Yoshwa ashika vanu va Isalele

¹⁰ Asinoni Yoshwa washikile vantwama

¹¹ kwita mu cilombo nakwendeka kuli vanu va Isalele ngwavo, “Vwaeseni vyakulya, indele mukajavuka Ndonga ya Yondau nakukovela mu lifuti lije lyakamyana Shukulu Kalunga Njambi yeni ngeci mulishwane.”

¹² Oloni Yoshwa wendekele ku miyati ya Luvena, na Ngande, na ku litambelo lya muyati wa Manase ngwendi,

¹³ “Anukeni lijwi lije lyamishikile Mosesa ngamba ya Shukulu Kalunga ngwendi, ‘Shukulu Kalunga Njambi yeni akamyana lifuti eli lili ku mutambela wa mu ngangela ya Yondau kupwa lifuti lyeni.’

¹⁴ Vanakazi veni, na vana veni, na vimuna veni vakasala muno mu lifuti lije lyamyanene Mosesa, musambwa lino mu ngangela ya Yondau. Oloni mashwalale veni vakajavuka musambwa kulutwe lwa vavushoko vweni vaIsalele ngeci mukavakwase

¹⁵ kuvanga noo vanatambula lifuti lije lili mu kangombe ka yambi ya Yondau lije lyanavana Shukulu Kalunga Njambi yeni. Omo vanashwana laja lifuti lije lyanavana Shukulu Kalunga Njambi yeni, asinoni mukeluka nakutunga muno mu lifuti lyeni mu ngangela ya Yondau, eli lyamyanene Mosesa ngamba ya Shukulu Kalunga.”

¹⁶ Asinoni vakumbulwile Yoshwa ngwavo, “Tukalinga vyuma vyoshe vije viwunatuleka, co tukaya kwoshe-ikwoshe kuje kuukatutuma.

¹⁷ Muje mutwononokele kuli Mosesa mu vyuma vyoshe, mukemwo vene mutukononoka kuli yove. Oloni cuma lika cimo, Shukulu Kalunga Njambi yove akale amo nove ngwe mwakele amo na Mosesa!

¹⁸ Munu woshe uje akavyana kushika kwove nambe kujeneka kwononoka mashiko ove vakamutsiye. Kolesa lika nakusimpa!”