Yombi 9 - Livulu lya Shukulu Kalunga

Yombi

¹ Co Yombi wamukumbulwile ngwendi,

² “Mwa vushunga njazivuka mukemwo mucafwa vene. Oloni vatijo munu asa kupwa muka-vushunga ku mesho a Njambi?

³ Vatijo munu asa kulinga na Njambi vimata? Njambi asa kwihula vihula 1,000 oloni naumo wai asa kumukumbulula.

⁴ Njambi muka-mana na nzili, munu naumo wai emana nakumulwisa.

⁵ Ikeye atundisa minkinda kwa kuyanukisa, co mu vukalu vwendi ayinyongesa.

⁶ Njambi akajajesa kaye nakuningangesa livu, nakujajesa vimanda vyalyo.

⁷ Ikeye ashika litangwa, co kulitu ceke, na vingongonosi kutwa ceke ku vutsiki.

⁸ Naumo wai wakwasele Njambi kujangumuna melu, nambe kulyata a mankimba mu mema a kalunga.

⁹ Njambi ikeye muka-kutanga Vana va Tulwi na Muta-mbambi mwilu, na Lishano Mutumbu na vingongonosi vya mu mbwela.

¹⁰ Kutwasa kuzivisisa vyuma vyakama vije vyakalingi, na vikomokesa vyendi vyavingi vije naumo wai asa kuvilava.

¹¹ “Kenga, Njambi aita kuyehi oloni kunjimumono, alinakuya kulutwe lwange oloni kunjimunongonona.

¹² Ambata vije ashaka, co naumo wai amuvindika, naumo wai asimpa nakumwihula ngwendi, ‘Vikajo ulinakulinga?’

¹³ Co vukalu vwa Njambi kuvwesi kuhwila muyehi. Watsenene vitozi vendi vaje vakwasele Lahave, uje cikashama wa mu mema a kalunga, muka-kumuyeluwisa.

¹⁴ Yange iyajo ngeci njikumbulule Njambi? Njangula vatijo majwi ngeci njijokote nendi?

¹⁵ Nameme nji muka-kujeneka mulonga, cuma cinjilinga lika kulomba kutetela kuli Njambi lyaako lyange.

¹⁶ Nga anjitava njendeke, kunjikulaela ngeci anjitolilila.

¹⁷ Ikeye anjinakula na lihunzi lyakama nakunjitsena, nakutumisa vimbandu vyange kwakujeneka mulonga.

¹⁸ Ikeye katava ngeci njihwime muku wange, ikeye nashulisa mwonyo wange na kayando.

¹⁹ Yange njasa kumusindiya ndi? Njasa kusindiya Njambi ndi? Njasa kumutwala ku mbanja ndi? Iyajo asa kumutwalako?

²⁰ Nameme nji muka-kujeneka mulonga na munu wakukulaela, oloni kanwa kange kanjihisa, co vyuma vyoshe njilinakwendeka, vilinakusholoka kunjihisa.

²¹ Nameme nji muka-kujeneka mulonga, oloni njinayeluwisa mwonyo wange,

²² vyoshe vinapu mumolika. Muka-kujeneka mulonga nambe muka-mulonga, Njambi akavanyongesa.

²³ Nga mushongo wa ciita utsiya vwasi munu, co Njambi ajola tuyando twa muka- mulonga.

²⁴ Njambi naana kaye kuli vaka-vuvi. Ikeye napuputiisa mesho a vaka-kusompa voshe. Co nga Njambi kacilingile, ngwe iyajo nesikucilinga?

²⁵ “Matangwa ange alinakuhwa vwasi kutuvakana muka-kushatuka lumbisi, matangwa ange alinakwita vwasi, oloni kuwamono vyavivwa.

²⁶ Mwonyo wange ulinakwita vwasi ngwe vwato vwita, vwita vwasi ngwe kambembe akwavula muna kasumbi.

²⁷ Nga njendeka ngwange njivale tuyando twange, co cihanga cange cijeneke kumwesa vusiwa, cipwe cakujolela,

²⁸ njazivuka ngeci anga vene Njambi akanjitumbula muka-mulonga.

²⁹ Vananjihisa laja, vikajo lalo njundanganena?

³⁰ Kukwesi njapau yasa kutundisa vuvi vwange.

³¹ Njambi anga akanjumbila mu mbulu ya mazilo, nameme vuzalo vwange vukanjizivisa shwamwa.

³² Nga Njambi wapwile munu, nga njasa kumukumbulula, twapandele kuya ku mbanja mukusompa vin̄anda vyetu.

³³ Oloni kukwesi lyaako mukati ketu ngeci atusompe muvuvali vwetu nange na Njambi.

³⁴ Njambi, kesi unjihise! Kesi unjipupe embwe!

³⁵ Yange kunjesi na lyova, njinapande kwendeka vene, omwo njizivuka muyafwa mbunge yange.