Yombi 8 - Livulu lya Shukulu Kalunga

Mbilendande

¹ Asinoni Mbilendande kaShuhe wakumbulwile ngwendi,

² “Unamanesa laja kwendeka majwi ove angoco ndi?

³ Njambi kesi kupengesa-pengesa vushunga, ikeye kesi kujuka kulinga vya vushunga.

⁴ Nga vana vove vanalingi vuvi ku mesho a Njambi, ngecivene, ikeye navahisa ngwe ku vivulumuna vyavo.

⁵ Oloni ololo tengulukeni nakwimana na Njambi Muka-nzili yoshe,

⁶ nga unapu uwamuvwa nakujela, asinoni Njambi akaija nakukukwasa, nakukwilwisila lalo naanga yove kupwa vwana vwove.

⁷ Co vufuko vwoshe wazimbalesele vunapu cuma cangoco, kwesekesa ku vije vyakakwana Njambi.

⁸ “Kenga kamandondo lika ku mana a ku san̄ulu, yongola a vushunga vatatetu valilongeselevwo.

⁹ Myonyo yetu yapwa ya kasimbu lika, nacimo cai cituzivuka, tulinakwita ngwe minzinze.

¹⁰ Oloni tava vanalume va ku san̄ulu vakunyanyama vakulongese, yove tolilila lika vije vendeka ngwavo,

¹¹ ‘Makanda kuwasa kumena kuje kukwesi mema, co nalumo lwai ukawana likava lili mu nunda.

¹² Nga mema oma cau, co akewo makanda alivanga kujujwama, simbu acili amandondo kuwateta nakuwapangesa.

¹³ Vanu vaka-vuvi vanalifu ngwe makanda, cinyangavili cavo cinahu, kasimbu lika, co Njambi vanamwivala.

¹⁴ Vakulaela vwanda-nzili vwa kavuvi.

¹⁵ Nga vajenjela a vwanda-nzili, kuma vwasa kuvakwata ndi? Nga vasakamena a vwanda, vwasa kuvakwata ngeci vemaneo ndi?’

¹⁶ “Vaka-vuvi vakapishuka mitwe ngwe vimbuto vya mu litanya, ngwe vimbuto vije vyashandokela mu lihya mwoshe.

¹⁷ Co mizi yavyo ilizengelela a mutumbo wa mamanya, co vikala mukati ka mamanya.

¹⁸ Oloni omo vaikanguvulako, co naumo wai akazivuka kuje kuyakele.

¹⁹ Kenga, oku kukekwo kujolela kwa vaka-vuvi, omo vakevo vanatunduko, co veka vakaya nakwinga mitambela yavo.

²⁰ “Kenga, Njambi kakavyana muka- mulonga, co ikeye kakakwasa vanu vaka-vuvi.

²¹ Ikeye akakulingisa ngeci ujolele, nakutambakana mukujolela,

²² oloni akazivisa shwamwa vaje vakuzinda, co membo a vaka-vuvi akanyonga.”