Yombi 7 - Livulu lya Shukulu Kalunga

¹ Mwonyo wa munu unafu ngwe mashwalale vavasindiya kupanga, matangwa endi anapu ngwe a ngamba wakukumuna,

² ngwe ndungo ashungwiya manene munzinze, ngwe muka-vipangi avandamena fweto yendi.

³ A ngonde na ngonde kunjesi na cuma cakuyoya naco, co a vutsiki na vutsiki njilinakuyanda.

⁴ Omo njilala, co njendeka ngwange, simbu mukajo njikenduka? Co vutsiki vwoshe njilinakutonga-tonga noo kutuuka kwa litangwa.

⁵ Muvila wange unashulu na tulongolo, uli na vimbandu, na masina alinakutunda a vimbandu vyange.

⁶ Co matangwa ange alinakwita kujeneka cinyangavili, matangwa ange alinakwita vwasi ngwe mwakakwavula kambembe muna kasumbi.

⁷ “Anuka, Shukulu Njambi, mwonyo wange wapwa muku, mesho ange kuwakamono lalo vyavivwa.

⁸ Uje nanjimono ololo, oloni kakanjimono lalo. Mukanjishakezeka, oloni a simbu ije yange njinai laja.

⁹ Ngwe lishelwa lilinakutsitsivala, co lizimangana, mukemwo mwanafu munu uje ali mu vukalo vwa vatsi, kakatundumo embwe.

¹⁰ Co kakelukila lalo ku njuvo yendi, nambe vavushoko vwendi kuvakamwanuka lalo.

¹¹ Ngecivene, kunjasa kulikela kwendeka embwe! Njikatwalao kwendeka lika omwo ya vusiwa vuje vuli mu mbunge yange. Co njikatwalao kulinyenga omwo ya vukalu vwa mwonyo wange.

¹² “Omwo vikajo mulinakunjinyungiiya ngacije? Kuma mwayongola ngeci yange njapwa nji cikashama wa mu mema a kalunga ndi?

¹³ Njilala nakweseka kuhwima, ngeci njiwane kuhwima kukuvinjoka kwange.

¹⁴ Oloni yeni mulinakunjitewesa na vinjozi, mulinakunjizivisa lyova na vimona, na vilota vya vutsiki,

¹⁵ ngwe cinasiwile nga kunjatsa lika cintukulu kutuvakana kuyoya mu muvila ou wa tuyando.

¹⁶ Njinonwa, omwo njajuka kuyoya, njeceleni ange lika. Mwonyo wange unapu wangoco.

¹⁷ “Omwo vikajo munu wapwa wa vulemu kuli yove? Omwo vikajo ulinakumwena vije vyalinakulinga?

¹⁸ Yove u muka-kumwindwisa a mutondo na mutondo, co ukamwilula a kasimbu na kasimbu.

¹⁹ Yove kuwesi kukenga kweka simbu yakama, nambe kunjecela ngeci njimine mate ange.

²⁰ Nga njinalingi vuvi, vikajo njikalinga kuli yove? Yove muka-kunyunga vanu nakuvakenga. Omwo vikajo unanjipangesa mu vipangi a seteko iwunamanga? Kuma yange njinapu citele cakama kuli yove ndi?

²¹ Omo vikajo kuwesi kunjisambesela ku vivulumuna vyange? Kuma kuwasa kunjecela ku kupenga-penga kwange oku njilinakulinga? Njikalala mu mbumbo, co mukanjishakezeka, oloni kumukanjiwana.”