Yombi 6 - Livulu lya Shukulu Kalunga

Yombi

¹ Asinoni Yombi wakumbulwile ngwendi,

² “Nga mishongo yange na tuyando twange vyapwile vyakupeselesa a cipeseleso,

³ vikevyo vyapandele kulema manene kutuvakana lishen̄avu lya ku mema a kalunga, ngeci majwi ange kesi akukomokesa embwe.

⁴ Njambi Muka-nzili yoshe nanjasha mikili, ngeci vulembe vwayo vunajalakana mu muvila wange. Vyakujujwisa vya Njambi vilinakunjilwisa.

⁵ “Ngolo akohyo omo alya mwila, co ngombe wa lwavo akoloka kuluu omo alya mwila wakuma.

⁶ Oloni iyajo asa kulya vyakulya vya vushamu, vyakujeneka kutova mwongwa? Vutovalesi vukajo vuli mu mema-mena a mukati ka livunda?

⁷ Kunjesi na sholovya ya vyakulya vya cifwa cangacije, omwo vinapu vyakulya vya vunyengwe kuli yange.

⁸ “Omwo vikajo Njambi kanjana evi njimulomba? Omwo vikajo kakumbulula lilombelo lyange?

⁹ Nga cinamuvwasele Njambi ku mbunge nga nanjitsii!

¹⁰ Nga njazivukile ngeci alingamo, nga njajolela nakundikangela, nameme kuvinjoka kwange kunapu kwakama manene. Njazivuka ngeci Njambi wapwa wakujela, yange kunjavyanene vije vyakashiki.

¹¹ Nzili mukajo njilinayo ngeci njitwaleo kuyoya? Omwo vikajo njili na kutwalao kuyoya omo kunjesimo na cinyangavili?

¹² Kuma yange vanjipangele na limanya ndi? Kuma muvila wange wapwa wa vunengu ndi?

¹³ Yange kunjesi na nzili yakulyamena yange vavenya, naumo wai asa kunjamena.

¹⁴ “Mu tuyando twakufwa ngeci otu, kushakiwa vasamba va kulongwa, nambe njinevala Njambi nambe embwe.

¹⁵ Oloni yeni vasamba vange munanjikwisa, ngwe vana va vindonga vaje vakuma a simbu ya lilanga.

¹⁶ Mema a mu vana va vindonga evi anapu akutonola nakuzivala, co mbundu inavifwiki,

¹⁷ oloni a simbu ya ntwima vyuma cau.

¹⁸ Co vimbunga vya vanu vazimbalele mukushakezeka mema, co mukwendangana vanyongele mu mambo.

¹⁹ Vimbunga vya vanu vaka-kutunda ku Shemba na ku Tema vashakezekele mema,

²⁰ oloni cinyangavili cavo cahwile omo kuvawanene mema.

²¹ Yeni munafu ngwe vaje vana va vindonga kuli yange, omo munamono tuyando twange, co muziva lyova.

²² Yange njamilombele ngeci munjane vwana? Nambe ku vufuko vweni mwambateko vwana munjilingileko lizika-kanwa?

²³ Nambe munjamene ku citozi? Nambe ku muka-n̄ole?

²⁴ “Mwamuvwa, njilongeseni, njilekeni mulonga wange, yange njoloka kuluu, co njitolilila kuli yeni.

²⁵ Majwi amavwa akazembeleka, oloni yeni mulinakwendeka vyangoco.

²⁶ Yeni muyongola kuvayesa majwi ange, munayongola ngeci vyendeka vya munu wa seo, vinalifu na lihunzi lyakuhuwa.

²⁷ Yeni mwasa kuta n̄ela ngeci visiwa muvapwise vindungo, nakulifukisa a vasamba veni va a mbunge!

²⁸ Kengeni ku cihanga cange, kunjesi nakwendeka makuli embwe.

²⁹ Yongoleni lalo a vije mulinakwendeka, kengeni ngeci kunjalingile mwamuvi.

³⁰ Yeni muyongola ngweni njilinakwendeka makuli. Muyongola ngweni yange kunjasa kunongonona vyavivi nevi vya vushunga ndi?