Yombi 5 - Livulu lya Shukulu Kalunga

¹ “Yombi, tambeka. Nga munu umo akakukumbulula. Kuli kangelo umo asa kukukwasa ndi?

² Ulinakulipesa yove vavenya kutsa na cishota-mbunge, cinapu ca vulema.

³ Njamwene vilema vaje vayoyele kuyoya kwakuvwa oloni vwasi-vwasi njasingile membo avo.

⁴ Co vana vavo va vanalume kuvakawana kwoloka, naumo wai akavemanena mu mbanja.

⁵ Vanu vaka-njala vakalya vimbuto vya vilema, nameme vimbuto vije vyakumenena mukati ka mambimbo, vaka-kulakama vakashungwiya vufuko vwendi.

⁶ Vuvi kuvwesi kumena mu livu ngwe vimena, nambe tuyando kutwesi kumena mu livu ngwe mwila.

⁷ Mwa vushunga embwe! Munu ikeye muka-kulishakela tuyando, ngwe muvikatinuka vishashe a tuhya.

⁸ “Nga yange njinapwile ngwe yove, nga njinashakezeka Njambi nakumuleka mulonga wange.

⁹ Ikeye lika asa kulinga vyuma vyakama vije kutwasa kuzivuka na vyuma vyakukomokesa vije kutwasa kuvizivisisa.

¹⁰ Ikeye akanyokesa nyonzi ano a kaye, nakunyokesa lalo nyonzi mu mahya.

¹¹ Eyo, Njambi ikeye muka-kujundula vaka-kulikeesa, nakwana kujolela kuli vaje voshe valila.

¹² Ikeye muka-kutanganesa matumbe a vaka-kunyanyama, ngeci kukwesi cuma civalinga civezike.

¹³ Vaka-kunyanyama vatsa mu myeto na kutsa mu matumbe avo vavenya,

¹⁴ simbu ya mutanya vaimona ngwe lisusulungu, co mukati ka mutanya vapapateya ngwe vutsiki.

¹⁵ Oloni Njambi amena tuutu ku kutsa, ikeye amena vaje vavalinakuyandesa.

¹⁶ Aana cinyangavili ku tuutu, nakwolwesa vaka-vuvi.

¹⁷ Kenga, navezika munu uje Njambi amulongesa! Ngecivene, kesi uyeluwise kulongesa kwa Njambi.

¹⁸ Omo Njambi akutwa mbandu, co azengao, nambe akupupa na mavoko endi, anga vene mavoko endi akukangwisa.

¹⁹ Co ku simbu na simbu akakwamena ku vushonde,

²⁰ omo njala ya lyangengela ikaija, ikeye akakunyunga, co mu nzita akakunyunga ku kutsa.

²¹ Njambi akakupatula kuli vaka-kwendeka makuli. Ikeye akakwamena kukunyonga.

²² Kuvakakunyongesa nambe kuukakala na njala, kuukazivi lyova lya vikashama.

²³ Mahya awukalima kuwakakala na shaku, co vikashama kuvakakulwisa.

²⁴ Asinoni ukakala mu kwoloka mu njuvo yove, omo ukakenga ku vimanga vove, co ukavawana valimwamuvwa.

²⁵ Ukazivuka ngeci vatekulwila vove vakapwa vavangi, vana vove vakapwa vavangi ngwe mwila wa asi.

²⁶ Ukatsa mu vukulukazi vwove, ngwe mukuta wa tiliku wa kuteja a simbu yawo.

²⁷ Kenga, cuma eci tunaciilula nakuwana ngeci mukemwo mucafwa, citolilile nakucizivuka yove vavenya.”