Yombi 42 - Livulu lya Shukulu Kalunga

¹ Asinoni Yombi wakumbulwile Shukulu Kalunga.

Yombi

² Njizivuka, Shukulu Kalunga ngeci yove u muka-nzili yoshe, co wasa kulinga vyoshe viwushaka.

³ Wanjihwile ngwove vatijo njasa kwihula mana ove, omwo yange kunjizivuka cuma nacimo cai. Njinendeka vije kunjazivukile, vyuma vyakukomokesa manene, vije kunjazivukile.

⁴ Wanjilekele ngeci njikutolilile omo wendekele, nakweseka kukumbulula vihula vyove.

⁵ A simbu ya kunima, njazivukile lika vyuma vije vivanjilekele vakwetu, oloni ololo njinakumono na mesho ange.

⁶ Ngecivene, njinazivi shwamwa ya vije vyoshe njinendeka, co njitumbama mu livu na mu lito kumwesa ngeci njinatenguluka.

Mamaneselelo

⁷ Omo Shukulu Kalunga wamanesele kwendeka kuli Yombi, co wendekele kuli Elifaze ngwendi, “Njinaluvala nove na vasamba vove vavali, omwo kumwendekele vya vushunga ali yange, ngwe mwanendeka ngamba yange Yombi.

⁸ Ngecivene, ambateni vingombe va nkomba vatanu na vavali na majamba a vimanga vatanu na vavali mutwale kuli Yombi, co mukavakombelela kupwa n̄ombelo yeni vavenya. Yombi akamilombelela, co njikakumbulula lilombelo lyendi, kunjikamizivisa shwamwa ngwe mumwapandele. Yeni kumwendekele vya vushunga ali yange, ngwe mwalingile Yombi.”

⁹ Ngecivene, Elifaze, na Mbilendande, na Zofale valingile vije vyavashikile Shukulu Kalunga, co Shukulu Kalunga wakumbulwile lilombelo lya Yombi.

¹⁰ Asinoni, omo Yombi walombelele vasamba vendi vatatu, co Shukulu Kalunga wamuwezelele nakumwingisilamo luvali ku vije vyakele navyo akulivanga.

¹¹ Co vandolome va Yombi voshe, na vandokazi vendi, na vasamba vendi vaje vakele navo laja vezile kuli ikeye, co valingile ciwano amo nendi mu njuvo yendi. Co vamwesele vusiwa vwavo ali ikeye nakumuzembeleka a tuyando twoshe tuje twanenele Shukulu Kalunga ali ikeye. Co munu na munu wamwanene vimbongo na kanzeya ka ngolinde.

¹² Co Shukulu Kalunga wavezikisile Yombi a matangwa endi akukotokela kutuvakana a matangwa endi akulivanga. Co Yombi wakele na vimanga 14,000, na tumelo, 6,000, na vingombe vakulimisa 2,000, na vimulu 1,000.

¹³ Co wakele na vana va vanalume vatanu na vavali na vana va vanakazi vatatu.

¹⁴ Co walukile lizina lya uje munendi wa munakazi wa ntwatwa ngwendi Njemima, wamucivali wamulukile ngwendi Keziya, co mutinikila wamulukile ngwendi Kelene Hapuke.

¹⁵ Mu lifuti mwoshe kumwakele vanakazi vavavwa ngwe vana va Yombi. Co ishavo wavapangelele vushwana amo na vandolome vavo.

¹⁶ Munima yevi, Yombi wayoyele myaka 140, co wamwene vatekulyendi, na vatekulwila vendi.

¹⁷ Omo Yombi wakuluvalele manene, co watsile.