Yombi 40 - Livulu lya Shukulu Kalunga

¹ Shukulu Kalunga wendekele kuli Yombi ngwendi,

² “Kuma uje muka-kuwanena vakwavo milonga asa kusompa na Muka-nzili yoshe ndi? Woshe uje ali na vimata na Njambi, mweceleni akukumbulule.”

Yombi akumbulula Yombi

³ Asinoni Yombi wakumbulwile Shukulu Kalunga ngwendi,

⁴ “Kenga, yange iyajo ngeci njikukumbulule? Vikajo vinjikukumbulula? Yange nalumo lwai njikendeka lalo.

⁵ Njinendeka lumo kunahu, co kunjikakumbululako lalo, njinendeka visimbu vivali, oloni kunjikatwalao lalo embwe.”

Kukumbulula kwa Shukulu Kalunga

⁶ Asinoni mu kankumba kakama Shukulu Kalunga wakumbulwile Yombi ngwendi,

⁷ “Kolesa ngwe munalume, co kumbulula vihula vyange.

⁸ Kuma yove ulinakweseka kunjiwanena mulonga ngeci yange njihye yove usambe ndi?

⁹ Kuma yove uli na nzili ngwe yange ndi? Kuma lijwi lyove lyasa kukala na cililimo cakama ngwe lyange ndi?

¹⁰ Nga ngoco ni, zala kasingimiko kove na kulyalesa ngwe vuzalo, co zala vukama na vumpau ngwe mwiva.

¹¹ Mwesa vukalu vwove vwakama, kenga voshe vaje vaka-kulyalesa ngeci uvononwese.

¹² Kenga ali voshe vaje vaka-kulyalesa ngeci valikeese, tsena vaka-vuvi aje avanemana.

¹³ Vatsinde mu livu voshe, co vakutiiye mu lifuti lya vatsi.

¹⁴ Co njikapwa yange wakulivanga kukushangala, nakutava ngeci unahyana.

¹⁵ Kenga Mbehemote uje injatangele ngwe munjatangele yove. Ikeye akali mwila ngwe ngombe,

¹⁶ kenga oni nzili yendi ije yakala mu muvila wendi, na nzili yendi ije yakala mu mishuni ya mwimo lyendi!

¹⁷ Mukila wendi watindivala ngwe muti wa kendale, co mishuni ya mu mendi endi yapwa ya nzili.

¹⁸ Vitsiya vyendi vyakala na nzili ngwe vunengu, co mendi endi alifwa ngwe mikambo ya vutale.

¹⁹ “Ikeye wapwa wakukomokesa ku vitanga vyange vyoshe! Kuvanga muka-kumutanga lika ikeye asa kumufungulula.

²⁰ Mwila wakali ukamene lika ku malundu, kuje kuvakeela vikashama.

²¹ Ikeye akakala mwisi ya maputa a mambimbo, co akavanda mukati ka mahongo a mu likava.

²² Co maputa a mambimbo, na minango ya kutepama ya ku ngenge ya muna ndonga, ikeyo yapwa minzinzime yendi.

²³ Ikeye kesi kutewa cingungumuta. Akasimpi omo Ndonga ya Yondau iitisa mema ayo ku mesho endi.

²⁴ Iyajo asa kutsitsivalesa mesho endi nakumufungulula? Nambe iyajo asa kukwata lijulu lyendi mu mweto?