Yombi 4 - Livulu lya Shukulu Kalunga

Visimutwiya vyakulivanga Elifaze

¹ Elifaze kaTemane wakumbulwile Yombi ngwendi,

² “Yombi, nga munu endeka nove, co uviilila mu mbunge ndi? Kunjasa kwoloka lika kuluu.

³ Kenga, yove walongesele vanu vavangi, nakwana nzili kuli vanu vaje vanazeye

⁴ Omo munu wapelyangelele, nakuzeya nakujuka, co majwi ove amukolesele mukwimana.

⁵ Oloni omo vukalu vunete kuli yove, co wazeye nakushota mbunge, omo ukenga avukevwo.

⁶ Yove walemesele Njambi, co kuyoya kwove kwapwile kwa vushunga, co unapande kukala na cinyangavili nakusimpa.

⁷ Anuka vya kunima, munu iyajo muka-vushunga ivanyongesele?

⁸ Vanu vaje valinga vuvi valinakukuna vuvi vwavo, co vateja lalo vuvi vwavo.

⁹ Njambi akavanyongesa mu vukalu vwendi vwakama.

¹⁰ Majwi a vaka-vuvi anapu ngwe kwana kwa vindumba, oloni Njambi avakanda nakupokozola mayo avo.

¹¹ Ngwe vindumba vaje vanajeneka kukwata kasitu ngeci valye, oloni vatsa, co vana vavo vashandoka.

¹² “Munu umo wanjiyevetelele, co njazivile vije vyendekele.

¹³ Capwile ngwe njozi ku vutsiki, ije ikatanganesa tulo.

¹⁴ Njakasumukile nakuziva lyova, co njajajele.

¹⁵ Njazivile lihunzi pepya ku mesho ange, njazivile mu vitsiya njenje.

¹⁶ Njamwene cuma cimo cinemana kuje, co njalikasamenene, oloni kunjasele kunongonona cifwa caco. Asinoni njazivile lijwi ngwalyo,

¹⁷ ‘Munu asa kupwa wakushungama ku mesho a Njambi, nambe kupwa wakujela ku mesho a Ishamatanga wendi?

¹⁸ Kengeni, inonwa Njambi kakulaelele vangamba vendi va mwilu. Ikeye akawana milonga nameme kuli tungelo twendi.

¹⁹ Kuma yove uyongola ngwove ikeye akulaela citanga ca ku vuma, citanga cakutunda ku likungu cije vasa kutsena ngwe menzi?

²⁰ Munu asa kuyoya ku mutondo, oloni atsa cintulu omo litangwa kanda litoke.

²¹ Vyoshe vije vyalinavyo vakamunyekavyo, atsa, oloni anga acijeneka mana.’