Yombi 38 - Livulu lya Shukulu Kalunga

Shukulu Kalunga akumbulula Yombi Shukulu Kalunga

¹ Asinoni Shukulu Kalunga wendekele kuli Yombi mu kankumba ngwendi,

² “Yove iyajo ngeci utanganese viyongola vyange, na majwi akujeneka mana?

³ Co ololo imana nakukolesa ngwe munalume, co kumbulula vihula vinjikwihula.

⁴ Yove wakele kuli omo njajalele luvula lwa kaye? Njileke nga uli na mana.

⁵ Iyajo wayongwele seteko ya kaye? Nambe iyajo wasetekeleo mukole? Njileke nga uzivuka vihula vyoshe evi.

⁶ Vikajo vyemika vimanda vije vyakwata kaye? Iyajo wajalele limanya lya mu mbango ya kaye?

⁷ A mungulungengu vingongonosi vyalikungulwile na kwimba mwaso, co vanu va mwilu vatambekele nakujolela.

⁸ Iyajo washokele vikolo vya kwimika mema a kalunga omo atuukile mu livu?

⁹ Yange njafwikile mema a kalunga na mashelwa, nakuwafwika mu lisusulungu.

¹⁰ Yange njatwile cipalo ca nginga ya mema a kalunga, nakwakako vikolo na tupateso.

¹¹ Co njendekele ngwange, ‘Kuno vene kukekwo kuukahwila! Kuno vene kukekwo kukemana mankimba ove akama.’

¹² Yombi, mukuyoya kwove kwoshe, washikao laja litangwa ngeci lituuke ndi?

¹³ Kuma yove washikao laja litangwa kutuuka ano asi, nakuninganga vaka-vuvi ngeci vatunde ku myela ije ivanavanda ndi?

¹⁴ Mutanya ukamwesa malundu na vimbongo kusholoka ngwe mukundwilo wa nanga, vikatungukwa ngwe cisateso cakundinda a vuma.

¹⁵ Ceke ca litangwa citwa manene, co civindika vaka-vuvi kulinga vukalu.

¹⁶ “Yove wakovelamo laja mutuvwelu-vwelu twa kulova twa mu mema a kalunga ndi? Yove wendao laja asi ya mema a kalunga ndi?

¹⁷ Vakusholwela laja vikolo vyakukovelela mu lifuti lya vatsi, nambe wamona laja vikolo vya ku njuvo ya lisusulungu lyakuzivala vwii ndi?

¹⁸ Wazivuka vukama vwa kaye muvwapwa ndi? Njikumbulule nga uzivuka.

¹⁹ “Yove uzivuka kucatunda ceke nambe nsina ya lisusulungu muyapwa?

²⁰ Yove wasa kuvamwesa nunda ivanapande kwenda, nambe kuvatepulwilako lalo ndi?

²¹ Mwa vushunga yove wasa, omo unapu u mukulunu, co kuwakele omo vatangele kaye!

²² Kuma yove wakovelamo laja mu vinjuvo vyakutulikila mema akukonda, nambe wamona vinjuvo vyakutulikila nyonzi ya mamanya ndi?

²³ Yange njavinyungila visimbu vya tuyando, na a matangwa akulwa vinzita.

²⁴ Yove wayako laja ku mutambela kuje kukatuukila litangwa? Nambe ku mutambela kuje kukatundu lihunzi lya mu ngangela lije likahuhwila ano asi ndi?

²⁵ “Iyajo wendile vingunja mwakwitila mema a nyonzi, nakuvwaesa ngila ya mihyato yakuluma?

²⁶ Iyajo akanyokesa nyonzi ku mutambela kuje kwakujeneka vanu?

²⁷ Iyajo akatukumwina mema ku mutambela wakuma cau, ngeci uje mwila wakwo ujovelele?

²⁸ Kuma nyonzi nambe lime vyakala na ishavyo ndi?

²⁹ Iyajo cisemi ca mema akukonda naa akulikwata ngo?

³⁰ Vyuma vika vije vikatengulwisa mema kupwa mamanya, nakukondela akamwa ya mema a kalunga?

³¹ “Wasa kukutila amo Lishano Mutumbu nambe kuzitula mikole ije yakuta va Muta-mbambi ndi?

³² Wasa kutwamenena vingongonosi simbu na simbu yavyo a mwaka, nambe wasa kutwamenena Vana va tulwi?

³³ Yove uzivuka mashiko aje akendesa mwilu? Nambe wasa kuwapangesa ano asi ndi?

³⁴ “Yove wasa kutendeka lijwi lyove ku mashelwa, ngeci livazi lyakwo likufwike ndi?

³⁵ Wasa kutuma mihyato ngeci iije, nakwendeka kuli yove ngwayo, ‘Yetu vanovo.’

³⁶ Iyajo naaka mana mu mashelwa, nambe iya naana mana akuzivisisa?

³⁷ Iyajo nanyanyama manene mukulava mashelwa, nakuwapangesa ngeci anyokese nyonzi,

³⁸ nyonzi ije ikolesa livu nakulipwisa mitumbo?

³⁹ “Yove wasa kuyombela ndumba wa lwavo vyakulya, nambe kutsiya njala ya vana va vindumba

⁴⁰ omo vavanda mu viteke vyavo, nambe vavutama a lyumbu mukuvandamena ndi?

⁴¹ Iyajo muka-kushakezekela likololo vyakulya, omo vana vendi valinakulilila kuli yange nakwendangana kwa vyakulya?