Yombi 37 - Livulu lya Shukulu Kalunga

¹ Omo a eci mbunge yange ijaja, yatundu mungangu yayo.

² Tolilileni yeni voshe, ku lijwi lya Njambi, ku muhyato uje ulinakutunda mu kanwa kendi.

³ Ikeye akatumu muhyato kutunda ku shongo imo ya ano asi nakweta ku shongo ikwavo.

⁴ Asinoni vakaziva kuluma kwa lijwi lyendi, co aluma na lijwi lyendi lyakama, co muhyato uhyahyata simbu yoshe.

⁵ Akushika kwa Njambi vyuma vyakukomokesa vilingiwa, ikeye alinga vyuma vyakukomokesa vije yetu kutwasa kuvilinga.

⁶ Ikeye akashiki mema akukonda ngeci anyokele asi, akanyokesa nyonzi ya vusuku-mbundu kujulisa kwoshe.

⁷ Avindika vipangi vya munu woshe, ngeci vanu voshe vaje vanatanga vazivuke vipangi vyendi.

⁸ Tusitu vatunda a mombu, co vakovela ku mateke avo.

⁹ Lihunzi lya mu mbwela lihuwa, co linena kankumba, lihunzi lya ku kunto linena lisika.

¹⁰ Muku wa Njambi ukondesa mema, nakuwatengulula kupwa akukonda.

¹¹ Co muhyato wakuyemuna ukatundu mu mashelwa,

¹² akewo alinakushwenya akushika kwa Njambi. Co alinga vyoshe vije Njambi avishika, kwoshe-ikwoshe mu kaye mwoshe.

¹³ Njambi akatumu nyonzi kunyokela ano asi, ikeye asa kuyituma mukunyanyamesa vanu, nambe mukuvamwesa vuvwa vwendi.

¹⁴ “Yombi, imana tai kamandondo nakutolilila, singanyeka vyuma vyakukomokesa vyakalingi Njambi.

¹⁵ Wazivuka Njambi muje mwakashiki na muje mwakayemwisa mihyato mu mashelwa ndi?

¹⁶ Wazivuka mashelwa muje mwakapekumuka mwilu? Evi vikevyo vipangi vya Njambi vya vutongwe vyakukomokesa.

¹⁷ Vikajo uzivila ntwima ya vuzalo vwove omo mu lifuti munoloka na lihunzi lya mu mbwela?

¹⁸ Kuma wasa kujala lilu ngwe Njambi? Likelyo lyapwa lyakukola ngwe vutale vwakusangununa.

¹⁹ Tulongese mutukendekela kuli Njambi, mana etu apwa amupulungwa, kutwesi na vimo vyakwendeka.

²⁰ Kunjasa kulomba kwendeka na Njambi, omwo vikajo njimwanena vukovelelo vwakunjinyongesa?

²¹ “Co lilu linajele na lihunzi, co ololo ceke cilinakuvyazima mwilu. Cilinakuvyazima manene kutwasa kukengako.

²² Ku kunto kwizilila kuvyazima ngwe ngolinde, Co Njambi nazala vumpau vwakujujwisa.

²³ Nzili ya Njambi inapu yakama ngeci kutwasa kushwenya kuli ikeye, napu wa kulongwa na vushunga mukupanga kwendi na vanu.

²⁴ Ngecivene, vanu vakamukomoka, ikeye kesi kumbako mbunge, kuli vaje valiyongola vakevo vavenya kupwa vaka-mana.”