Yombi 36 - Livulu lya Shukulu Kalunga

¹ Co Elihu watwaleleo nakwendeka ngwendi,

² “Njitolilile kamandondo, co yange njikakumwesa ngeci yange njili na vimo vyakwendeka kwimanenako Njambi.

³ Kuzivuka kwange cinatuvakana, njipangesa vije njizivuka, mukumwesa ngeci Njambi, Ishamatanga wange wapwa wa vushunga.

⁴ Cuma nacimo cai cinjendeka kuli yove cipwe ca makuli, kenga, kulutwe lwove kuli muka-mana wa vushunga.

⁵ “Kenga, Njambi ikeye Muka-nzili, kesi kuyengula munu, Njambi Muka-nzili yakukolesa mana akuzivisisa.

⁶ Ikeye kesi kutava muka-vuvi ngeci ayoye embwe, oloni simbu yoshe akapangesa vushunga kuli vaka-kuyanda.

⁷ Ikeye muka-kunyunga vaje vaka-vushunga, akavatavesa, kushwana ngwe vimyene, nakuvatava ngeci vavasingimike ku myaka yoshe.

⁸ Oloni nga vanu vanakutiwa mu malyenge, nakuyandela vije vivanalingi,

⁹ co Njambi avamwesa vuvi vwavo, na kulyalesa kwavo.

¹⁰ Ikeye ashokolola matwi avo, ngeci vazive vilongesa nakuvashika ngeci vatunde ku vuvi vwavo.

¹¹ Nga vononoka kuli Njambi nakumupangela, co vakayoya mwamuvwa mu kwoloka.

¹² Oloni nga kuvamutolilila, co vakanyonga ku moko ya mukwale, co vakatsa mu vunzimba vwavo.

¹³ “Co vaje vaka-vuvi vakatwalao kuviilila, nameme omo vavahisa kuvashaka kulomba ngeci vavakwase.

¹⁴ Vakevo vatsa omo vacili vanike vavandondo, co kuyoya kwavo kunapu kwa shwamwa.

¹⁵ Oloni Njambi alongesa vanu omo vali mu tuyando, apangesa mapakeso ngeci ashokolole mesho avo.

¹⁶ “Njambi wakutundisile mu tuyando, nakutava ngeci ukale mwamuvwa, co mesa yove yashulile na mutumbo wakama wa vyakulya.

¹⁷ Oloni ololo yove valinakukuhisa ngwe mucinakupande.

¹⁸ Nyanyama kesi utave vaka-mazika-kanwa kukukwisa embwe, nambe vufuko vukuungumwine kweka.

¹⁹ Kuma kulila kwove kukwamena ku tuyando ndi? Nzili yove yoshe kuyasa kukukwasa ololo.

²⁰ Kesi ushungwiye vutsiki ngeci vwije, simbu ije omo miyati vakanyonga.

²¹ Nyanyama kesi utengulukile ku vuvi embwe, omwo tuyando twove vatutumine ngeci utunde kutuketwo.

²² “Anuka vukama vwa nzili ya Njambi, ikeye mulongisi wakama ku vyoshe.

²³ Naumo wai asa kuleka Njambi mwakupangela, nambe kumuvangela ngeci nalingi vuvi.

²⁴ Anuka kushangazala vipangi vyendi, vije vivashangazalele vanu mu myaso.

²⁵ Munu woshe namono vije vyalingile, oloni kutwasa kuzivisisa vyoshe.

²⁶ Kutwasa kuzivuka vukama vwendi, nambe kulava vungi vwa myaka yendi.

²⁷ “Njambi ikeye muka-kutundisa mema ano asi, nakuwatengulula mambase a nyonzi.

²⁸ Ikeye akanyokesa nyonzi kutunda ku mashelwa, nakunyoka mingole ku vanu voshe.

²⁹ Naumo wai azivuka mashelwa muwakende, nambe muhyato muukalumu mwilu, muje mwakala Njambi.

³⁰ Ikeye akatumu ceke mwilu mwoshe, oloni kwisi ya mema a kalunga kwakala lisusulungu lika.

³¹ Omu mukemwo mwakalisa vanu, nakuvana vyakulya vyakulisala.

³² Ikeye akakwata muhyato na mavoko endi, nakuushika ngeci utombole kuwila mu cimango.

³³ Cililimo ca nyonzi cituleka ngeci naluvala manene omwo ya vuvi.