Yombi 35 - Livulu lya Shukulu Kalunga

¹ Co Elihu watwaleleo kwendeka ngwendi,

² “Yombi kesi mwamuvwa kuli yove kwendeka ngwove yove unapu u wa kulongwa ku mesho a Njambi,

³ nambe kwihula Njambi ngwove, ‘Vuvi vwange vukuviisa vatijo? Vikajo njinawanao a kulinga vuvi?’

⁴ Yange njikukumbulula nakukumbulula lalo vasamba vove.

⁵ “Kenga mwilu! Mona kutundwa kwa mashelwa kutuvakana yove!

⁶ Nga ulinga vuvi, eci kucinene vushonde kuli Njambi. Nga uviisa visimbu vyavingi, kuma eci kucipu vushonde kuli ikeye ndi?

⁷ Nga u muka-vushunga vika ukamwana? Cuma nacimo cai catonda Njambi kuli yove.

⁸ Vuvi vwove vwasa kuviisa mukweni munu, co vuvwa vuulinga kuli ikeye vwasa kukwasa mukweni munu.

⁹ “Omo vanu valinakuvayandesa, co vavinjoka, vatambeka ngeci umo avakwase.

¹⁰ Oloni kuvesi kutengulukila kuli Njambi, Ishamatanga wavo uje muka-kuvana cinyangavili mu simbu yavo ya vukalu.

¹¹ Kuvesi kutengulukila kuli Njambi, uje akatupwisa vaka-mana, uje akatupwisa vaka-mana manene kutuvakana tusitu nambe tuzila.

¹² Vakevo vatwa kawelele ngeci vavakwase, oloni Njambi kavakumbulula embwe, omwo vakevo vaka-kulyalesa, co lalo vaka-vuvi.

¹³ Cinapu cangoco kuli vakevo kutwa kawelele, Njambi Muka-nzili yoshe kasa kuvamona nambe kuvaziva.

¹⁴ Yombi, yove wendeka ngwove kuwasa kumona Njambi, oloni tatamena lika nakusimpa, n̄anda yove ili kuli ikeye.

¹⁵ Yove uyongola ngwove Njambi kesi kuhisa, ngwove ikeye akatolilila kamandondo ku vuvi.

¹⁶ Eci cinapu cangoco kuli yove kutwalao kwendeka mwa vushunga vene yove kuuzivuka vije ulinakwendeka.”