Yombi 34 - Livulu lya Shukulu Kalunga

¹ Asinoni Elihu wendekele ngwendi,

² “tolilileni ku majwi ange, yeni vaka-mana, co jendekeleni matwi eni kuli yange, yeni vaka-kuzivuka vyuma,

³ litwi likeseka majwi, ngwe muje kanwa kakeseka vyakulya.

⁴ Twanguleni cije cakushungama, ngeci tuzivuke akati ketu cije cacivwa.

⁵ Yombi nendeka ngwendi ikeye napu wakujeneka mulonga, ngeci Njambi natundisa vushunga muli ikeye.

⁶ Ehula ngwendi, ‘Nameme nji muka-vushunga, oloni vanjitumbula muka-makuli, mbandu yange inapu ya mukongo, oloni yange kunjalingile vuvi.’

⁷ “Yombi, munalume iyajo nalifu nendi? Ikeye kesi kukomoka Njambi.

⁸ Uje aya mu munga ya vaka-kulinga mwamuvi, co endeka na vanu vaka-vuvi.

⁹ Omwo nendeka ngeci ngwendi nacimo cai cikwasa munu kuvwaelela muli Njambi.

¹⁰ “Ngecivene, njitolilileni, yeni vanalume vaka-kuzivisisa! Njambi kesi kulinga vuvi nambe kamandondo, co Muka-nzili yoshe kesi kulinga vuvi embwe.

¹¹ Ikeye aana cikandelela kuli vanu ngwe ku vilinga vyavo, nakuvapangesa kwesekesa ku vipangi vyavo.

¹² Njambi Muka-nzili yoshe kesi kulinga vuvi embwe, ikeye kesi kulinga vuvi ku munu.

¹³ Kuma Njambi wambatele nzili yendi kuli weka ndi? Nambe iyajo namukundika kaye koshe?

¹⁴ Nga Njambi natundisile muku wa mwonyo,

¹⁵ vanu voshe vakuyoya nga vanatsi, nakwimuka lalo livu.

¹⁶ “Nga munazivisisa tolilileni vinjendeka.

¹⁷ Kuma mulinakuhisa vushunga vwa Njambi ndi? Kuma mwayongola ngweni Njambi wazinda vushunga ndi?

¹⁸ Njambi akahisa vimyene na vaka-kushwana, omo vatenguluka na kupwa vangoco nambe vaka-vuvi.

¹⁹ Ikeye kakemanena ku mutambela wa vaka-kushwana lika embwe, nambe kushangala vaka-kufuka ali vaka-kuutwa embwe, omwo voshe ikeye wavatangele.

²⁰ Munalume asa kutsa vwasi-vwasi mukati ka vutsiki. Njambi akahisa vanu, co vanyonga, akatsii vaka-nzili nakupindako kwai.

²¹ Mesho endi alinakukenga mu vingila vya vanu.

²² Kukwesi lisusulungu lyakuzivala vwii lyasa kushweka muka-vuvi ku mesho a Njambi.

²³ Njambi kesi kwimika simbu, ngeci atundise vantwama nakwingisamo veka lalo.

²⁴ Ikeye kesi kulohwelela ngeci atundise vantwama nakwingisamo veka lalo.

²⁵ Omwo azivuka vilinga vyavo, co avanakula nakuvatsena a simbu ya vutsiki.

²⁶ Ikeye akahisa vaka-vuvi mutanya mwelu, kuje voshe vasa kucimona,

²⁷ omwo vanalikela kumukava, nakuvyana lalo mashiko endi oshe.

²⁸ Vasindiiye tuutu kulilila kuli Njambi, co Njambi wazivile mutambi wavo wakuvakwasa.

²⁹ “Nga Njambi ayongola kulinga cuma, co naumo wai asa kumupopolola. Nga ashweka cihanga cendi, co vanu vapwa vangoco.

³⁰ Nacimo cai civakalinga vanu, mukuvindika vaka-kujeneka kukulaela vaje valinakuvapakesa ngeci kesi vavashwane.

³¹ “Yombi, walitavela vivi vyoshe kuli Njambi? Nakumukulaesa ngwove kuukalingi lalo vuvi ndi?

³² Unehula Njambi kukumwesa milonga yove? Co unatava kulikela kulinga vuvi ndi?

³³ Omwo ulinga vimata na vije vyalinga Njambi, co yove umuyongwela kulinga vije viwushaka ndi? Co kuvatula n̄anda cili kuli yove, kesi kuli yange embwe, tuleke oni vati unayongola.

³⁴ “Munu woshe muka-mana mwa vushunga asa kutava, co munu woshe wakunyanyama uje anjiziva, nendi lalo akendeka ngwendi

³⁵ Yombi alinakwendeka vyangoco, co nacimo cai calinakwendeka cinapu ca mana.

³⁶ Yongoleni vyuma vyoshe vije vyanendeka Yombi, mumone nga alinakwendeka ngwe munu muka-vuvi.

³⁷ Co ku vuvi vwendi alinakukumbasanako kutengulukila, ku mesho etu voshe, ikeye alinakushendumuna Njambi.”