Yombi 33 - Livulu lya Shukulu Kalunga

¹ “Yombi, tolilila mwamuvwa ku vyoshe evi njilinakwendeka.

² Yange njalivwaesela cimweja kwendeka evi vili mu mbunge yange.

³ Majwi ange oshe anapu amavwa, co njilinakwendeka vya vushunga.

⁴ Munzinzime wa Njambi ukewo wanjitangele, co muku wa Muka-nzili yoshe ukewo wanjanene mwonyo.

⁵ “Njikumbulule nga wasa, co vwaesa visimutwiya vyove.

⁶ Kenga, nove nange tunapu mumolika ku mesho a Njambi, tuvavoshe vatumungile ku livu.

⁷ Ngecivene, yange kunjikuzivisa lyova, co nzili yange kuyasa kukwonwesa embwe.

⁸ “Njinazivi unendeka ngwove.

⁹ ‘Yange njinajele, kunjesi na mulonga. Kumwesi vuvi muli yange.

¹⁰ Oloni Njambi alinakushakezeka lika kashwilo kakunjilwisa, nakunjitumbula nji citozi cendi.

¹¹ Naaka mendi ange mu tukunju, ikeye elula manambo oshe anjikende.’

¹² “Oloni Yombi njikuleka ngwange unapengesa omwo Njambi wapwa wakama kuhyana munu.

¹³ Omwo vikajo wana mulonga Njambi, akujeneka kukumbulula kukulinyenyeta kwa munu?

¹⁴ Nameme Njambi endeka vati, co naumo wai omba mbunge ku vije endeka.

¹⁵ Ku vutsiki omo vanu vanalala, co Njambi endeka kuli vakevo mu vinjozi na mu vimona.

¹⁶ Ikeye akalingisa vanu kutolilila ku vije endeka, co vakevo valijajela a vinangula vyendi.

¹⁷ Njambi akendeka kuli vakevo ngeci valikele kulinga vuvi, nakuvavindika kulyalesa.

¹⁸ Ikeye kakatava ngeci vavanyongese, akavamena ku kutsa.

¹⁹ Njambi akanyanyamesa munu akutuma mishongo kuli ikeye, co matangwa oshe apinda nakuvinjoka mu vitsiya vyendi.

²⁰ Munu muka-kuvinja sholovya ya vyakulya yaimo muli ikeye, nameme kukenga vyakulya vyakutovala ku mbunge yendi vwii.

²¹ Muvila wendi unangwangama, vimati-mati lika kwauu,

²² ali muyehi nakuya ku lifuti lya vatsi.

²³ “Amo kangelo akaija mukumukwasa, umo wa ali tungelo twa Njambi vakupwa 1,000, uje muka-kwanukisa vanu vipangi vyavo.

²⁴ Co mukutetela kangelo akendeka ku lifuti lya vatsi ngwendi, ‘Mwecele! Kesi ashelumuke kuli yove embwe. Njinawana ndando mukumukula.’

²⁵ Muvila wendi ukavwaa kutuvakana uje wa vwanike, eluka ku matangwa a vukwenje vwendi.

²⁶ Omo alombela kuli Njambi, co Njambi amumwesa ngozi, co akalemesa Njambi nakujolela, co Njambi akamulingila vyuma vyavivwa lalo.

²⁷ Co ikeye akendeka mu mbunga ya vanu ngwendi, ‘Njalingi vuvi. Kunjalingile mwamuvwa embwe, oloni Njambi nanjamena.

²⁸ Ikeye wanjikulile ngeci kesi njiye ku lifuti lya vatsi, co na simbu ino njicili nakuyoya.’

²⁹ “Evi vyoshe Njambi avilinga ku munu luvali nambe lutatu,

³⁰ ikeye muka-kwamena mwonyo wa munu ku mbulu, ngeci amone ceke ca mwonyo.

³¹ “Co ololo, Yombi, tolilila ku evi njendeka, oloka kuluu ngeci yange njendeke.

³² Oloni nga uli na cuma cimo cakwendeka, co njikumbulule, endeka omwo njishaka kukusambesa.

³³ Oloni nga kesi ngoco, co oloka kuluu utolilile lika kuli yange, co njikulongesa vati kunyanyama mucafwa.”