Yombi 32 - Livulu lya Shukulu Kalunga

Visimutwiya vya Elihu

¹ Ngecivene, vanalume vaje vatatu vonwele kukumbulula Yombi, omwo walimwene ikeye vavenya kupwa wakushungama.

² Co Elihu muna Mbalakele mutekulwila wa Mbuze, wa ku cikota ca Lama, waluvalele manene omwo Yombi walisambesele ikeye vavenya kuli Njambi.

³ Co Elihu lalo waluvalele na vasamba va Yombi vatatu. Vakevo kuvasele kuwana ngila imo yakukumbulula Yombi, eci cikeco casholokele kupwa ngwe Njambi nalingi vuvi.

⁴ Omwo Elihu wapwile mukwenje, co wavandamenene noo voshe ava vanamanesa kwendeka.

⁵ Omo wamwene ngeci vaje vanalume vatatu kuvasele kukumbulula Yombi, co waluvalele.

Elihu

⁶ Elihu muna Mbalakele kaMbuze wakumbulwile ngwendi, “Yange nji mwanike, yeni mu vakulunu, co yange njakele na lyova lyakumileka munjinayongola.

⁷ Njayongwele ngeci yeni mwapandele kwendeka, co yeni mu vanalume vakukola, mwapandele kulongesa mana.

⁸ Oloni unapu Munzinzime wa Njambi Muka-nzili yoshe, uje ukaija kuli vanu nakuvana mana.

⁹ Kupwa mukulunu kucilingisa munu kukala na mana nambe kuvakwasa kuzivuka vije vinapu vya vushunga.

¹⁰ Ngecivene, ololo njishaka ngeci munjitolilile, maneni njimileke vinjinayongola.

¹¹ Kengeni, njavandamenene majwi eni, co njatolililile kukusompa kweni kwa mana omo mwakele nakushakezeka vyakwendeka.

¹² Co njamitolililile, naumo wai wavayesele Yombi, nambe kukumbulula majwi endi.

¹³ Nyanyameni kutewa mwendeka ngweni tunawana mana, Njambi ikeye asa kukumbulula Yombi kesi munu embwe.

¹⁴ Yombi nakele nakwendeka kuli yeni, kesi kuli yange embwe, oloni yange kunjimukumbulula na majwi ngwe umunakala nakwendeka yeni.

¹⁵ “Munalikomokela, co kumukumbululako lalo, kumwesi na majwi akwendeka.

¹⁶ Kuma njivandamene omwo vanoloka ndi? Omwo vanemana lika kuvakumbululako lalo?

¹⁷ Embwe, ololo njikakumbulula nakumileka vije njinayongola.

¹⁸ Omwo njili na majwi, co mbunge yange ilinakunjisindiya ngeci njendeke.

¹⁹ Nga kunjiwana simbu yakwendeka, co njikatuvika ngwe njeke ya cilambu ije inashulu na vinyu vyaviha.

²⁰ Njinapande kwendeka, ngeci njizive ehu ku mbunge, njinashama kanwa kange nakukumbululako.

²¹ Yange kunjikakenge ku muvila wa munu, nambe kushangala munu embwe.

²² Yange kunjizivuka kushangala, nga njilingamo, co vwasi-vwasi Njambi akanjihisa.