Yombi 31 - Livulu lya Shukulu Kalunga

¹ Njinalikumiya cikumiiyo na mesho ange ngeci nalumo lwai njikakenga mumbanda na lishungu.

² “Mutambela wange ukapwa ukajo kuli Njambi wa mwilu? Na vushwana vwange vukajo kuli Muka-nzili yoshe wa mwilu?

³ Kuma tuyando kutwesi kweta kuli vaka-vuvi? Na luvinda kuli vaka-kulinga vyavivi ndi?

⁴ Njambi azivuka vyuma vyoshe vinjikalingi, co akalava manambo ange oshe.

⁵ “Njilisinga ngeci kanda njilinge vuvi, co lalo kanda njeseke kukwisa vakwetu.

⁶ Njambi anjipeselese a cipeseleso cacivwa, amone ngeci nga njili na mulonga.

⁷ Nga njatundu mu ngila ya vushunga, nambe njilikokweya yange vavenya kuya ku vuvi, nga mavoko ange ali na mazilo a vuvi,

⁸ co vimbuto vyange vavitukule, nambe vanu veka valye vyakulya vije vinjinalimi.

⁹ “Nga njashungwiiye munakazi wa mukwetu, nambe kumuvandamena ku cikolo,

¹⁰ co munakazi wange ekile vilya munalume weka, nakulala a vulili vwa munalume weka.

¹¹ Omo cipululu capwa cacivi manene capwa vuvi vuje vanapande kuvusompa maako.

¹² Cikapwa ngwe kunyongesa kwa tuhya, kwenyeka vyuma vyoshe vije njilinavyo.

¹³ “Nga njinavyana lijwi lya ngamba yange wa munalume nambe wa munakazi, omo valinyengelele kuli yange.

¹⁴ Nga kunjilingimo, vatijo njasa kulimona na Njambi? Vatijo njasa kwendeka omo Njambi aija mukunjisompa?

¹⁵ Njambi uje vene wanjitangele, ikeye lalo watangele vangamba vange.

¹⁶ “Yange nalumo lwai njavyanene kukwasa tuutu, co kunjatavele ngeci vifwile vayoye kwakujeneka kuvakwasa,

¹⁷ nambe kutava ngeci visiwa vakale na njala omo yange njakele nakulya.

¹⁸ Mukuyoya kwange kwoshe, njavanyungile.

¹⁹ “Omo njawanene munu umo kautu, uje kasa kulanda vuzalo,

²⁰ co njamwanene vuzalo vwa maka a vimanga, akutunda ku litanga lya vimanga vange. Co ikeye anjishangazala na mbunge yendi yoshe.

²¹ “Nga njakwisile siwa umo, ngeci njikasambe mu mbanja,

²² co mavoko ange apokoke, apamuke a vitsili vyange.

²³ Omwo yange njitewa cihiso ca Njambi, co kunjasa kulinga cuma ca cifwa cangacije.

²⁴ “Yange kunjakulaelele mu vufuko,

²⁵ nambe kulyalesela a vufuko vwange.

²⁶ Yange kunjalemesele litangwa, mukuvyazima kwalyo, nambe ngonde mu vuvwa vwayo vwoshe.

²⁷ Kuvyanjungumwisile kunjitwala kweka mukuvilemesa, nakutsemba livoko lyange nakuvisingimika.

²⁸ Eci nga cinapu mulonga ku mesho a maako, omo nga njinapu wa kulongwa kuli Njambi wa mwilu.

²⁹ “Yange kunjajolele omo vitozi vange vakele mu tuyando, nambe kuvwaelela omo vakele mu vukalu,

³⁰ yange kunjalingile vuvi akulombelela vitozi vange ngeci vatse.

³¹ Vanu voshe vaje vakapanga kuli yange, vazivuka ngeci yange simbu yoshe njikatambula vangenzi.

³² Njalanyele vangenzi kwija ku njuvo yange, co yange kunjavatavele ngeci valale mushandangala yangoco.

³³ “Vanu vamo vakeseka kushweka vuvi vwavo, oloni yange kunjashwekele vuvi vwange.

³⁴ Omwo njazivile lyova lya mbunga yakama, co kayengu ka vavushoko kanjizivisile lyova, ngeci njolokele kuluu, co kunjatuukile anja.

³⁵ “Kuma naumo wai atolilila kuli vije njilinakwendeka ndi? Njilisinga ngeci majwi oshe anapu a vushunga. Eceleni Njambi Muka-nzili yoshe anjikumbulule. Nga milonga yanjikutiiye citozi cange vaisonekele ngeci njilimweneyo,

³⁶ nga njinavizala a vitsili vyange ngwe vuzalo mu kulyalesa, nga njinavyaka a mutwe wange ngwe cilongo.

³⁷ Nga njaleka Njambi vyuma vyoshe vinjalingi, nakwenda nakundikangela ku mesho endi.

³⁸ “Nga njayandesele livu lije linjalimine, nakulipangela na muuka ngeci lilinyenge,

³⁹ co nga njalilemo vyakulya vije vyamenenemo, nakwecelela vandimi ngeci valanduke ku njala,

⁴⁰ nga njalingilemo, co mu mwela wa tiliku na mu mwela wa mbale ya maumwa, mumene mambimbo na shaku.” Majwi a Yombi anahwila ano vene.