Yombi 30 - Livulu lya Shukulu Kalunga

¹ “Oloni ololo vaje vanapu vanike kuli yange, valinakunjiyeluwisa! Vaishavo simbu yoshe kuvesi na seo ngeci kunjatavesele tutali twange kukwasa kunyunga vimanga.

² Yapwile munga ya vanu vaje vanakuluvala, vakuzeya manene vaje kuvasele kupanga vipangi vyange.

³ Vapwile vaka-kuutwa na njala ya lyangengela, ngeci vatsembele mizi yakuma a simbu ya vutsiki mu mambo, ku mitambela ya mu vingundu vyangoco.

⁴ Vatukwile vimena vya mu mambo nakuvilya, valile nameme mizi ya muti wakukombesa wa vutovalesi.

⁵ Vanavasheke mukati ka vanu, na mitambi munima yavo, ngwe muje vakatambeka vezi.

⁶ Vakele mu viteke vya manzenzengoma, na viteke vya mu mamanya vije vendile.

⁷ Co mu mambo volwile ngwe tusitu, co valikungulwile amo mwisi ya maputa.

⁸ Vakevo vanapu vilema vangoco va lizina! Co vavashekele mu lifuti.

⁹ “Ololo valinakwija nakunjijola, yange njinapu njiwangoco kuli vakevo.

¹⁰ Vananjizindi nakunjijenjuka, omo vanjimona, co vajekula mate.

¹¹ Omwo Njambi nanjipwisa munu wakuzeya na munu wangoco, vananjitengulukila na vukalu vwavo vwoshe.

¹² Munga ya viyambangani valinakunjilwisa, vanjisheka nakushakezeka vingila vyakunjinyongeselamo.

¹³ Vananjishokela kwakuvandela, co vashaka kunjinyongesa, co naumo wai avavindika.

¹⁴ Valinakunjilwisa ngwe mashwalale vatuva civumbe, co vaija nakulyalanga ali yange.

¹⁵ Vyakujujwisa vyanjiwana, vukama vwange vuneti ngwe lihunzi, co vufuko vwange vuneti ngwe lishelwa.

¹⁶ “Ololo njili muyehi na kutsa, matangwa a n̄avava ananjiwana.

¹⁷ Ku vutsiki vitsiya vyange vyoshe vilinakutenda, co mishisha ilinakungwima simbu yoshe.

¹⁸ Njambi nakwata ku matwi a cikoveyo cange, co vuzalo vwange vunatenguluka,

¹⁹ Shukulu Kalunga nanjumbila mu vutome, co njinatenguluka ngwe livu nambe ngwe lito.

²⁰ “Njilinakutambeka kuli yove Shukulu Njambi, oloni yove kuwesi nakunjikumbulula, omo njilombela, co yove kuumbuko mbunge.

²¹ Yove unemuka kupwa muka-muuka, co ulinakunjiyandesa na nzili yove yoshe.

²² Unanjecelela lihunzi lyakama ngeci linjipekumune, co wanjinakwila mu lihunzi lyakama lyakunjipekumuna.

²³ Njazivuka ngwange ulinakunjitwala ku kutsa, ku njuvo ije ivavwaesela vaka-kuyoya voshe.

²⁴ Omo vikajo ulwisila munu wakuvindama laja? Munu uje nacimo cai casa kulinga kuvanga lika kulomba ngeci vamuzivileko mema ku mbunge?

²⁵ Kuma yange kunjalilisile vanu vaje vakele mu tuyando? Nambe kuzivila mema ku mbunge vanu vaje vanajeneka ndi?

²⁶ Omo njakengelelele vuvwa, co kwezile vuvi, omo njavandamenene ceke, co lisusulungu lyezile.

²⁷ Mbunge yange ilinakuziva cikela, kuyesi nakuhwima, co a litangwa na litangwa njilinakumona tuyando.

²⁸ Njilinakwenda mu lisusulungu, mwakujeneka ceke, njikemana mu mbunga ya vanu kulomba kunjikwasa.

²⁹ Lijwi lyange lili na vusiwa na vulika, ngwe kuvwoza kwa mbanje nambe nkumbwa.

³⁰ Cikonde cange cinemuka cakuzivala, co cilinakujamozoka, co vitsiya vyange vilinakwenya na ntwima.

³¹ Kuje kunjazivile laja myaso yakuvwaelela, ololo njilinakuzivako lika vusiwa nakulila.