Yombi 3 - Livulu lya Shukulu Kalunga

Kulinyenga kwa Yombi kuli Njambi

¹ Munima yevi Yombi washangumukile kwendeka, co wasingile litangwa lije lyasemukile.

² Co Yombi wendekele ngwendi,

³ “Yove Njambi, singa litangwa lije njasemukile, singa vutsiki vuje vanjimitile!

⁴ Njambi, tengulula litangwa lije lipwe lisusulungu. Litangwa lije kesi vakalyanuke, co lalo litangwa lije kesi likatwe ceke.

⁵ Litangwa lije ulipwise lya mashelwa manene na lisusulungu, lipwe lyakufwika na mashelwa, co tundisa ceke.

⁶ Tundisa vutsiki vuje mu mwaka uje, kesi uvutave vavulavele mu matangwa a ngonde ije lalo.

⁷ Kesi kusemuke munu mu vutsiki vuje, majwi akujolela kesi akalemo.

⁸ Leka vimbanda vasinge lije litangwa, vimbanda vaje vasa kwononwesa Levyatane.

⁹ Vingongonosi vya a mungulungengu vitsitsivale, kesi vitwe ceke, vutsiki vuje kesi vukye, nambe kesi vumone misha ya mutondo.

¹⁰ Singa vutsiki vuje vwanjitavele ngeci njisemuke, vutsiki vuje vwajenekele kunjishweka ku tuyando nakukuviilila.

¹¹ “Mwamuvwa nga njatsililile mwimo lya vanana, nambe nga njatsile a simbu ije njasemukile.

¹² Omwo vika vanana vanjilelelele a mendi avo? Omwo vika vanjijamweselele ku mavele avo?

¹³ Nga njatsile, ololo nga njilimukuhwima,

¹⁴ kuhwima amo na vimyene na vaka-kushwana, vaje vatungulwile mapela a ku san̄ulu.

¹⁵ Nga njinalala ngwe vana va vimyene va vanalume, vaje vashulisile vinjuvo vyavo na ngolinde na siliva,

¹⁶ nambe kulala ngwe mwanike ivanajombwesa limbo, nambe ngwe mbututu wa kumona ceke.

¹⁷ Mu vimbumbo vaka-vuvi valikela kulinga vuvi, na vaje vanajuka kupanga, vakahwima akukotoka.

¹⁸ Nameme vinzinda vakakala mu kwoloka, kuhwima ku vijokota na ku mashiko amakalu.

¹⁹ Co vanu voshe vakakala kuje, vaka-lutsimo na vaje kuvatsimanene, co na vindungo lalo vakapatuka.

²⁰ “Omwo vikajo Njambi ecelela vanu kuyoya mu tuyando? Omwo vikajo wana ceke kuli vanu valimukuviilila?

²¹ Omwo valinakuvandamena kutsa, oloni kucesi nakwija, vakevo vanakulaela mbumbo kutuvakana vufuko vwoshe-ivwoshe.

²² Kuvasa kujolela, kuvanga noo vanatsi nakuvatsinda.

²³ Omwo vika vanamwesela ceke mu ngila ya munu uje kasa kumona? Uje Njambi nazikinina ngila yendi?

²⁴ Kukemanga kwange kunapu ngwe vyakulya vyange, co mivinjo yange itika ngwe mema.

²⁵ Cuma cije cinjizivila lyova cinanjiwana, neci cakujujwisa cinaija ali yange.

²⁶ Kunjesi mu kwoloka, nambe kuhwima, co vyeseko vyange kuvyesi nakuhwa.”