Yombi 29 - Livulu lya Shukulu Kalunga

Kumaneselela kwa vukaleo vwa mulonga wa Yombi Yombi

¹ Yombi wakumbulwile ngwendi,

² “Nga njikala ngwe munjakele vingonde vyalaja ngwe ku matangwa aje omo Njambi wanjinyungile.

³ Njambi simbu yoshe wakele amo nange, co wanjimwesele ceke ngeci njase kwenda mukati ka lisusulungu.

⁴ Ngwe muje njakele mwamuvwa a matangwa a vutukuka vwange, co vusamba vwange na Njambi vwanyungile limbo lyange.

⁵ Ngecivene, Njambi Muka-nzili yoshe, wakele amo nange, co vana vange voshe vanjizengelekele.

⁶ Co vingombe vange va lwavo na vimembe vakele na mavele amangi, co na miti ya olive yakolele mu livu lya mamanya.

⁷ Co omo njatuukile nakuya ku cikolo ca nganda kuje kwakele mbanja,

⁸ vakwenje vanjimwene, co vavandele, co vakulunu vakatukile vemanene,

⁹ co vamyata volokele kuluu.

¹⁰ Nameme vanu va vulemu volokele kuluu.

¹¹ “Co munu woshe uje wanjimwene, nambe kunjiziva, wanjishangalele a vije njalingile.

¹² Omo tuutu vatambekele, co njavakwasele, co njakwasele visiwa vaje kuvakele noku kuvakundamene.

¹³ Co vanu vaje vakele mu vukalu vwakama, vanjishangazalele, co njakwasele vifwile kukala mwamuvwa.

¹⁴ Njazalele vushunga ngwe vuzalo, co vukevwo vwanjifwikile, co kulongwa kwange kwapwile ngwe cikoveyo cacilaja, nakupwa ngwe cilongo.

¹⁵ Yange njapwile mesho a tupuputwa, na mendi a vilema.

¹⁶ Njapwile ngwe nji ishe ya tuutu, co njakwasele vangenzi vaje vakele mu tuyando.

¹⁷ Njanyongesele nzili ya vaka-muuka, co njacakunwine vaje vavayandesele.

¹⁸ “Asinoni njayongwele ngwange njikatsila mu njuvo yange, co njikatumisa matangwa ange ngwe lishen̄avu.

¹⁹ Njapwile ngwe mizi ya muti yakukala mu mema simbu yoshe, muti uje minango yawo ikajulu na lime.

²⁰ Simbu yoshe vanu vakele nakunjishangazala, co nzili yakele muli yange simbu yoshe.

²¹ Omo njakele nakunangula, co vanu volokele kuluu, vatolililile mwamuvwa vije njakele na kwendeka,

²² co nacimo cai vawezeleleleko omo njamanesele kwendeka. Co majwi ange akovelele muli vakevo ngwe mambase a nyonzi,

²³ munu na munu waatambwile mwamuvwa, ngwe vandimi vatambula nyonzi ya musanda.

²⁴ Njavajolele mwesu-mwesu, omo vajenekele likulaelo, co kuzanguluka kwange kwavasimpisile.

²⁵ Njavaangwilile ngila yavo nakuvatwamenena ngwe mwene atwamenena mashwalale vendi, nakuvazembeleka mukulinyenga kwavo.”