Yombi 26 - Livulu lya Shukulu Kalunga

Yombi

¹ Asinoni Yombi wakumbulwile ngwendi,

² “Yove unapu u mukwasi wakama kuli yange, yange nji kautu, na munu wakuzeya!

³ Kunangula kwove kwakuvwa, co yove waana mana ku cilema wakufwa ngwe yange!

⁴ Iyajo iwuyongola ngwove asa kuziva majwi ove oshe? Iyajo nakukwasele kuyongola majwi awa?

[Mbilendande]

⁵ Minzinzime ya vaka-kutsa ilinakujaja mema na vije vyakalamo vilinakujaja.

⁶ Vukalo vwa vatsi vuli mushelengwa ku mesho a Njambi, co kuvesi na vintelo vyakuvazikinina ku mesho endi.

⁷ Njambi wajangumwine lilu lya ku kunto nakunyengelesa kaye a mukambwila.

⁸ Njambi ikeye muka-kushulisa mashelwa na nyonzi, nakuwanyunga kutewesa atavozoka na vulemu.

⁹ Ikeye akashweke ngonde yoshe yamutunu mu lishelwa.

¹⁰ Ikeye waangunwine ceke ku lisusulungu, na cipalo cakulizenga akamwa ya mema a kalunga.

¹¹ Omo endeka ku vimanda vije vyakwata lilu, co vijaja na lyova.

¹² Eyi inapu nzili yendi, ije yahyanene mema a kalunga, na vutongwe vwendi wanyongesele cikashama Lahave.

¹³ Muku wendi ukewo walingisile lilu kelunguma, co livoko lyendi lyatsiile cikashama uje waputumukile.

¹⁴ Oloni evi vinapu lika viyongola vya nzili yendi, twavizivile lika na lijwi lyakuyeveta. Iyajo asa kuzivuka mu vushunga muvwapwa vukama vwa Njambi?”