Yombi 23 - Livulu lya Shukulu Kalunga

Yombi

¹ Co Yombi wakumbulwile ngwendi,

² “Na lelo vene kulinyenga kwange kunapu kwakulula, co livoko lya Njambi lyanjilemena kutuvakana kuvinjoka kwange.

³ Nga njazivukile kuje kunjasa kumuwanena, nakuzivuka kuya kuje kwali.

⁴ Nga njasa kulyendekela mulonga wange ku mesho endi, nakwambulula vukaleo vwange vwoshe.

⁵ Ngecivene, njikazivuka vika endeka, co vati akasa kunjikumbulula.

⁶ Kuma Njambi asa kupangesa nzili yendi yoshe nakunjitengulukila ndi? Embwe, oloni ngwe nanjitolilila.

⁷ Yange nji wa kulongwa, njasa kusimutwiya na Njambi, anjikumbulula ngeci yange kunjesi na mulonga ku vyoshe.

⁸ “Kenga, nameme njiya mu ngangela oloni Njambi waimo, nameme njiya mu kangombe ka yambi kunjikamuwana.

⁹ Njambi nakala nakupanga ku kunto na mu mbwela, oloni anga kunjamumwene.

¹⁰ Oloni Njambi azivuka ngila ije injilinakwenda, omo anjeseka, co njikatundamo ngwe ngolinde yakujela.

¹¹ Lindi lyange linalyata mbe mu myanja yendi, njinende mu ngila yendi nakutundamo kwai.

¹² Simbu yoshe njikalingi vije Njambi avishika, co njikalingi cizango cendi, kesi cizango cange embwe.

¹³ “Ikeye kesi kutenguluka. Co naumo wai asa kumuyeluwisa, nambe kumuvindika vije vyashaka kulinga.

¹⁴ Ikeye akashulisa vutumbe vuje watumbile ali yange, vutumbe vuje vunapu vumo vwa matumbe amangi aje alinawo,

¹⁵ omu mukemwo njilinakuziva lyova ku mesho endi, omo njisinganyeka evi vyoshe, co njimutewa.

¹⁶ Njambi nazeyesa mbunge yange, co Muka-nzili yoshe nanjizivisa lyova,

¹⁷ nga njilavuka mu lisusulungu, co lisusulungu lyakuzivala vwii likafwika cihanga cange.