Yombi 22 - Livulu lya Shukulu Kalunga

Visimutwiya vyamucitatu Elifaze

¹ Co Elifaze kaTemane wakumbulwile ngwendi,

² “Kuma munu asa kupwa wa seo kuli Njambi ndi? Munu uje ali na mana na seo ku mesho endi vavenya?

³ Kuma vilinga vyove vya vushunga vili na seo kuli Njambi? Nambe vuvwa vwove kuma vukamukwasa ndi?

⁴ Kuma yove ngwove omwo kuukomoka Njambi, mukemwo mwakuvalazelela ndi? Vikevyo vyaila nove ku mbanja ndi?

⁵ Embwe, oloni omwo unalingi vuvi vwakama manene, omwo a vyuma vyoshe vyavivi vije viwunalingi.

⁶ Ndolome yove akufwetela vimbongo vyanatambula, co wamutambwile vuzalo vwendi nakumuseza ngoco nacimo cai cazalele.

⁷ Yove wominime mema kuli vaje vajukile, nakumina vyakulya kuli vaje vakele na njala.

⁸ Wapangesele nzili yove na vukama vwove, ngeci ushwane lifuti lyoshe.

⁹ Kuwavyanene kukwasa vifwile lika, oloni yove wevile nakupangesa lalo visiwa na cikela.

¹⁰ Ngecivene, myeto yoshe inakuzengeleka, co vwasi-vwasi lyova linakuwana.

¹¹ Ceke cove cinatenguluka lisusulungu ngeci kuwasa kumona, co livazi linakungumbula.

¹² Kuma Njambi kakele mwilu ya melu akuhyana, nakukenga asi a vingongonosi, nameme vili akamwa manene ndi?

¹³ Co yove ukehula ngwove, ‘Vikajo Njambi vyazivuka? Ikeye wavanda mu mashelwa, co vatijo asa kutusompa?’

¹⁴ Uyongola ngeci mashelwa akuzivala amuvindika ngeci kasa kumona, omo enda a mukambwila wa lilu.

¹⁵ “Kuma yove ukenda mu vingila vyalaja, vije vivendele vaka-vuvi ndi?

¹⁶ Nameme simbu yavo te kanda icete, livazi lyavakupwile nakuvongumwina kulyala.

¹⁷ Ava vakevo vanu vaje vavyanene Njambi, co vakulaelele ngeci ikeye nacimo cai asa kuvalinga.

¹⁸ Oloni Njambi ikeye washulisile vinjuvo vyavo na vyuma vyavivwa, kunjasa kuzivisisa viyongola vya vaka-vuvi.

¹⁹ Vaka-vushunga omo vacimona vajolela, co vaka-kulongwa vavwaelela, omo vamona vaka-vuvi vavahisa.

²⁰ Co vyuma vyoshe vije vyakele navyo muka-vuvi vikanyonga, co tuhya tukenyeka cuma coshe cije cikasalao.

²¹ “Ngecivene, Yombi lihambe na Njambi, likele kumupangesa ngwe citozi, co mu ngila eyi, akakuvezikisa.

²² Tambula vilongesa vitunda mu kanwa kendi, co nyunga majwi endi mu mbunge yove.

²³ Eyo, unapande kulilumbilisa nakwiluka kuli Njambi, nakuseza vuvi vwoshe vuje vuli mu njuvo yove.

²⁴ Umbila kuti ngolinde yove, umbila ngolinde yove yaivwa mu muna ndonga wakuma.

²⁵ Tava Njambi Muka-nzili yoshe apwe ngolinde yove, co tava apwe siliva yove yakulundika mutumbo wakama.

²⁶ Co simbu yoshe ukapwa u muka-kukulaela kuli Njambi, co ukawana ngeci ikeye napu nsina yakujolela kwove.

²⁷ Omo ulombela, co ikeye akakukumbulula, co ukanyunga cisingo ciwalisingile.

²⁸ Co ukavezika mu vyoshe viwukalinga, co ceke cikatwa mu ngila yove.

²⁹ Njambi akakeesa vaka-kulyalesa, co akaamesa vaka-kulilumbilisa.

³⁰ Ikeye akakupatula nga unapu wa kulongwa, nga vije viwulinga vinapu vya vushunga.