Yombi 20 - Livulu lya Shukulu Kalunga

Zofale

¹ Co Zofale kaNamate wakumbulwile ngwendi,

² “Ngecivene, viyongola vyange vinjisindiya kukumbululako, omwo vwasi-vwasi vuli muli yange.

³ Evi viwunendeka vinapu vyakushaula, oloni njazivuka mwakukukumbulwila.

⁴ Kuma kuwazivukile ngeci ku visimbu vya ku san̄ulu, omo vaakele vanu vakulivanga ano asi,

⁵ kujolela kwa vaka-vuvi kukwesi kwishwala. Co kuvwaelela kwa vaka-kujeneka kukulaela kwapwa kwa kasimbu kakandondo.

⁶ Nameme wakele na lutsimo lwakama lwakweta na mwilu, na mutwe wendi weta ku mashelwa,

⁷ oloni ikeye vakamupekumwina kulyala ngwe liputa. Vaje vamuzivukile vakalikomokela nakutonda kuje kwanai.

⁸ Co akaita ngwe njozi, co kuvakamumono lalo, co akazimangana ngwe cimona ca ku vutsiki.

⁹ Ikeye kakasholoka lalo ku mwela kuje kwakele,

¹⁰ co vana vendi va vanalume vakavwaelela na vije vyevile kuli vaka-kuutwa.

¹¹ Muvila wendi uje wapwile wa vukwenje na nzili, oloni ololo ukemuka likungu.

¹² “Vuvi nambe vupwelelela mu kanwa kendi nambe avushweka kwisi ya ndaka yendi,

¹³ kashaka kuvwecela embwe, oloni avunyunga mu kanwa kendi,

¹⁴ oloni vyakulya vili mwimo lyendi vimuka vyakulula, ngwe vushungu vwa limbwambwa.

¹⁵ Muka-vuvi akashanja vufuko vuje wevile, Njambi avutundisa mwimo lyendi.

¹⁶ Vyoshe vije vyamina muka-vuvi vinapu ngwe vushungu vilinakumutsiya ngwe kushumuwa ku linyoka wa vushungu.

¹⁷ Kakamono vindonga na mipinda vije viitisa vuki na mavele akukonda.

¹⁸ Akelwisa vyoshe vije vyapangelele, co kakajolela na vufuko vwendi,

¹⁹ omwo wayandesele nakuyengula vaka-kuutwa, nakutambula vinjuvo vya vanu vije valitungilile vakevo vavenya.

²⁰ Muka-nuna kapwisamo na vije alinavyo.

²¹ Nacimo cai casaleleo cajenekele kulya, ngecivene, kufuka kwendi kukukeshwala.

²² Nambe wakele na vufuko vwavungi oloni akavujeneka, co tuyando tukaija ali ikeye.

²³ Omo akashaka kulya nakukuta! Co Njambi akamuhisa na vukalu vwendi vwakama.

²⁴ Omo akatewa ku mukwale wa cikuvo, co mukili wa vuta vwa lusipa vwa vunengu ukamwasha nakumuwisila asi.

²⁵ Co mukili ukamutiva a muvila wendi, co shongo ya mukili ikandweka maninga endi, nakumujujwisa manene.

²⁶ Vyuma vyoshe vije vyatulikile vikanyonga, co tuhya tuje kavwekele munu, tukamwenyeka na naanga yendi yoshe.

²⁷ Lilu likasholola vuvi vwa munu, co kaye kakana vukaleo ali ikeye.

²⁸ Vufuko vwa mu njuvo yendi vukashandoka, co vukahwa a litangwa lya vukalu vwa Njambi.

²⁹ “Otu tuketwo tuyando twa vaka-vuvi, tuyando tuje Njambi akavaanatwo.”