Yombi 19 - Livulu lya Shukulu Kalunga

Yombi

¹ Co Yombi wakumbulwile ngwendi,

² “Visimbu vingai mukayandesa mwonyo wange nakunjipunzozola na majwi?

³ Co a simbu na simbu mulinakunjituka, co kumwesi na shwamwa mu ngila eyi mulinakunjiyandeselamo.

⁴ Nameme nga njinazimbala, casa kumivavalesa ku mbunge vatijo?

⁵ Yeni mwayongola ngeci munapu muvavavwa kutuvakana yange, co munapwisa tuyando twange vukaleo vwa mulonga wange.

⁶ Kuma yeni kumwamwene ngeci Njambi ikeye nalingi eci ndi? Ikeye nanjitela mweto mukunjikwata.

⁷ Njilinakutambeka a vukalu vwendi, oloni naumo wai anjitolilila, co naumo wai aziva kutambeka kwange kwa vushunga.

⁸ Njambi nashoko ngila yange, co kunjasa kwita, naaka lisusulungu mu ngila yange.

⁹ Ikeye nambata vufuko vwange vwoshe, co naviisa lutsimo lwange.

¹⁰ Ikeye nanjimwakula ku mitambela yoshe, co natukula cinyangavili cange, ngwe muti nanjiseza ngeci njijujwame na kutsa.

¹¹ Njambi naluvala nakunjilwisa, alinakunjipangesa manene ngwe nji citozi cendi.

¹² Alinakutuma mashwalale vendi mukunjilwisa, vainda tupila nakuvandamo nakuzengeleka mbalaka yange.

¹³ “Njambi nanjishondolwesa ku naanga yange, njinapu ngwe nji mungenzi oni kuli vaje vanjizivukile,

¹⁴ vavushoko vwange na vasamba vange vananjivala.

¹⁵ Co vaje vapwile vangenzi mu njuvo yange vananjivala, co vangamba vange va vambanda valinakunjipangesa ngwe nji mungenzi na muka-kwija.

¹⁶ Omo njisana ngamba yange, co kakumbulula embwe, nameme nga njimulomba kunjikwasa.

¹⁷ Co munakazi wange kashaka kuziva muku wange wakunika, na vandolome vange shavo kushwenya kuyehi nange.

¹⁸ Vanike valinakunjishaula nakunjijola omo vanjimona.

¹⁹ Vasamba vange va a mbunge vanjikenga na vunyengwe, vanu vaje vanjazemene manene, ololo vananjitengulukila.

²⁰ Cikonde cange cilinakukapangela a vitsiya vyange, njilinakuyoyela lika aandondo.

²¹ “Njizivileniko mema ku mbunge! Yeni munapu mu vasamba vange. Livoko lya Njambi likelyo lilinakunjipupa.

²² Omwo vikajo munjipakesela ngwe mwalinakulinga Njambi? Kuma kumwapwisilemo mukunjiyandesa ndi?

²³ Nga casiwa munu umo anuke majwi ange, nakuwasoneka mu livulu!

²⁴ Nambe kucokola majwi ange mu limanya na shinjo, nakuwasonekamo ngeci akalemo simbu yoshe.

²⁵ Oloni njazivuka ngeci Numbi yange akaija akukotoka nakunjamena.

²⁶ Nameme cikonde cange cinaliwa na mushongo, kunjikamono Njambi mu muvila ou,

²⁷ njikamumona na mesho ange, co ikeye kakapu mungenzi lalo kuli yange. Kusimpa kwange kwonwene, omwo yove wendekele ngwove,

²⁸ ‘Vatijo twasa kumuyandesa?’ Yeni mwashakezekele mumo mwakulyolela malambi ngeci munjilwise.

²⁹ Oloni ololo, teweni mukwale, mukwale uje unena vukalu vwa Njambi a vuvi, ngeci muzivuke ngweni kwali umo ikeye lyaako.”