Yombi 18 - Livulu lya Shukulu Kalunga

Mbilendande

¹ Mbilendande kaShuhe wakumbulwile ngwendi,

² “Visimbu vingai ukasetela majwi? Co singanyeka, asinoni tukendeka.

³ Vikajo ulinakutuyongwela kupwa vilema ngwe vingombe?

⁴ Ulinakulivulumuna lika yove vavenya na vukalu vwove. Kuma asi akapwa ngundu omwo unaluvala ndi? Kuma Njambi akatundisa minkinda mukukuvwaelelesa?

⁵ Co ceke ca muka-vuvi cikazima, co mulangi wa tuhya twendi kuukatu ceke.

⁶ Co ndeya ya mu mbalaka yendi ikatsitsivala.

⁷ Manambo endi aje akolele ngo, oloni ololo apelyangela, na visinganyeka vya mana endi vikamuwisisa.

⁸ Nakovela a linimbwa, co mendi endi analizengela-zengelao.

⁹ Vanamutela mweto, co nganjo ikamushwika.

¹⁰ Vanamushitikila nganjo, co vanamutela mweto mu ngila.

¹¹ “Vyakujujwisa vikamuzengeleka nakumuzivisa lyova, co vikamukava mu manambo endi oshe.

¹² Ikeye wapwile muka-kufuka, oloni ololo napu muka-njala, tuyando tunamuvandamena kuyehi nendi.

¹³ Mushongo wa vutsi washandokela mu muvila wendi, co unavolesa mavoko endi na mendi endi.

¹⁴ Co vakamukoka mu mbalaka yendi muje mwakele nakuyoyela mwamuvwa, co vakamukokela kuli Mwene Kutsa.

¹⁵ Co ololo munu woshe nasa kukala mu mbalaka yendi, co vaketilao Sulufa.

¹⁶ Co mizi yendi yuma, na minango ijujwama.

¹⁷ Lutsimo lwendi lukahwa ano asi, co naumo wai akamwanuka lalo.

¹⁸ Vakamusheka mu lifuti lya vaka-kuyoya, co vakamutundisa mu ceke nakumumbila mu lisusulungu.

¹⁹ Co kakakala na mwana, nambe mutekulwila akati ka vana vendi, co naumo wai akasalao aje akele.

²⁰ Co kutunda mu ngangela, na mu kangombe ka yambi, voshe vakaziva tuyando twendi, vakaziva kuwazumuka muvila nakujaja na lyova.

²¹ Otu tuketwo tuyando twa vaka-vuvi, tuyando twa vaje kuvazivuka Njambi.”