Yombi 16 - Livulu lya Shukulu Kalunga

Yombi

¹ Co Yombi wakumbulwile ngwendi,

² “Njaziva laja majwi akufwa ngacije, kuzembeleka mulinakunjizembeleka nakwo, kunapu kwakunjizeyesa lika.

³ Majwi a seo kesi kuhwa ndi? Nambe vika vyamishangumuna ngeci mukumbululeko?

⁴ Nga yeni mwapwile ngwe yange, nange ngwe njapwile ngwe yeni, nga njasa kwendeka vyuma vyoshe vije mulinakwendeka. Nga njasa kumipikisila mutwe wange, nakumisindakana na majwi amangi.

⁵ Njasa kumitakamesa nakuminangula, nakwendeka kuli yeni nakumizembeleka.

⁶ “Oloni navimo vyai vinjendeka vikwasa, co lalo kulikela kuluu, kucasa kwolwesa kuvinjoka kwange.

⁷ Njambi, yove unanjizeyesa laja, unecelela naanga yange vavatsiye.

⁸ Yove unanjikwata, co unapu u citozi cange. Asala lika cikonde na vitsiya, co vanu vacendeka ngeci cinapu vukaleo vwa vuvi vwange.

⁹ Co mu vukalu Njambi nanjitavozola cilyo na cilyo, nanjiyungumwina mesho nakunjizinda.

¹⁰ Vanu vananjishendumuna, vananjipupu ku nana, nakunjikungulukila.

¹¹ Njambi nanjikundika ku mavoko a vaka-vuvi.

¹² Njayoyele mu kwoloka, oloni Njambi wanjikwatele a mulivu, nakunjimwakula nakunjitsena. Njambi nanjipwisa seteko yakulilongesela,

¹³ nakunjasha mikili ku mitambela yoshe, mikili ije inanjitivi nakunjivetwesa, nameme ngoco kesi na mema ku mbunge kuli yange embwe.

¹⁴ Ikeye anjivetwesa vimbandu-mbandu, co anjicuncumukila ngwe lishwalale wakuzaluka na cizindo.

¹⁵ Njalitongela cikeleya ca vusiwa, co njalishuwila livu ku mutwe wange.

¹⁶ Mesho ange avengele nakulila, co kunjasele kumona mwamuvwa,

¹⁷ oloni yange kunjesi na mulonga nambe lwozi lwai, co lilombelo lyange linapu lyakujela kuli Njambi.

¹⁸ “Ove kaye, kesi ushweke kupenga-penga kwange kuje njalingile! Kesi utave kwolwesa mutambi wange wa vushunga!

¹⁹ Kwali mukaleo wange mwilu, wakunjimanena.

²⁰ Vasamba vange vanjishendumuna, co mesho ange alinakulila misozi kuli Njambi.

²¹ Njishaka munu umo wakunjimanena kuli Njambi, ngwe munu emanena musamba wendi.

²² Ololo myaka yange ilinakuhwa, co njilinakuya mu ngila ije kunjikeluka.