Yombi 15 - Livulu lya Shukulu Kalunga

Visimutwiya vyamucivali Elifaze

¹ Asinoni Elifaze kaTemane wakumbulwile ngwendi,

² “Yombi, munu wa mana kapandele kwendeka majwi akujeneka seo,

³ Wai munu muka-mana endeka ngwe muwendeka yove, nambe kulyamena na majwi a cifwa cangacije kuwesi nomu mwaila.

⁴ Nga unakele mu ngila yove, nga naumo wai nesi kutewa Njambi, co naumo wai nesi kulombela kuli Njambi.

⁵ Vuvi vwove vulinakwimanena vije viwendeka, yove ushaka kuvanda mu majwi a vaka-linyanyamena.

⁶ Kesi yange njikuhisa embwe, oloni unalihisa na majwi oshe ulinakwendeka.

⁷ “Kuma yove wapwile munu wakulivanga kusemuka ano asi ndi? Kuma yove kuwakele omo Njambi watangele minkinda ndi?

⁸ Kuma yove wazivile matumbe akushwekesa alingile Njambi ndi? Kuma mana a vanu akala lika kuli yove ndi?

⁹ Kukwesi viwuzivuka yove vije yetu kutuzivuka.

¹⁰ Twalilongesele mana etu kuli vakulunu vaje vatoka vwele, vanu vaje vasemukile te kanda isho asemuke.

¹¹ “Kuzembeleka kwa Njambi, kuma cinapu cacindondo kuli yove? Majwi etu kuli yove apwile majwi a njozi.

¹² Oloni yove ulinakumbwenga-mbwenga, nakukenga kuli yetu shwii, na vukalu.

¹³ Yove uluvala na Njambi nakumushaula.

¹⁴ “Kuma munu asa kupwa wakujela ndi? Kuma munu asa kupwa muka-vushunga ku mesho a Njambi ndi?

¹⁵ Kenga, Njambi kakulaelele tungelo twendi vakujela, na melu kapwile akujela ku mesho endi.

¹⁶ Munu akanu vuvi ngwe mema, eyo, munu wapwa wa vunyengwe, lalo wapwa wakuviya.

¹⁷ “Ololo Yombi tolilila njikuleke vije njizivuka.

¹⁸ Vaka-mana vanjilongesele vushunga, vuje valilongesele kuli vakukulwila vavo, co kuvashwekele cuma cimo.

¹⁹ Mu lifuti lyavo kumwakele vaka-kwija, kukwakele umo uje wavatundisile kuli Njambi.

²⁰ “Munu muka-vuvi ayanda na mushongo matangwa endi oshe, ngwe seteko ije vene ivanatulikila muka-kuyandesa.

²¹ Majwi a muteto akujujwisa anakovela mu matwi endi, co vezi vamulwisa omo ayongola ngwendi ali mwamuvwa.

²² Ikeye kesi na cinyangavili cakutunda mu lisusulungu, omwo mukwale unamuvandamena kumutapa,

²³ co makuvi vanavandamena kulya muvila wendi. Ikeye nazivuka ngeci litangwa lya lisusulungu lili kuyehi,

²⁴ Ikeye ali mu kayando na n̄avava, vyuma vije vimuzivisa lyova, ngwe mwene uje alivwaesela kuya ku nzita.

²⁵ “Eci cinapu ngeci omwo ikeye nolola livoko lyendi mukulwisa Njambi, nakushendumuna Muka-nzili yoshe.

²⁶ Amushatukila nakushishimana mukoshi, na ntelo yendi ya nzita,

²⁷ omwo cihanga cendi canunile manene, co muvila wendi wakele na mazi.

²⁸ “Munu uje wafungulwile vinganda, nakutambula vinjuvo vije vavenyavo vatewele, oloni nzita ikanyongesa vije vinganda na vinjuvo.

²⁹ Co kakafuku lalo simbu yakama embwe, na vufuko vwendi kuvukeshwala. Nambe vufuko vwendi kuvukashalava ngwe mizi,

³⁰ co ikeye kakatundu mu lisusulungu. Co ikeye akafwa ngwe muti uje minango yawo inenye na tuhya, muti uje vishani vyawo vinapekumuka na lihunzi.

³¹ Kesi akulaele vuvi nakulikwisa, omwo vuvi vukapwa citelekela cendi.

³² Omo simbu yendi kanda icete akajujwama, co akajujwama ngwe munango, wa kuzivalela.

³³ Ikeye akapwa ngwe mukolovozi wa vushuka vwa vinyu, uje ulundumuna vushuka vwawo omwo vunekwiya, ngwe muti wa olive uje utotomoka vishani vyawo.

³⁴ Co kukukakala vatekulwila va vaka-vuvi, co tuhya tukanyongesa membo a vaka-lizika-kanwa.

³⁵ Ava vakevo vaka-kutumba matumbe akuyandesa na vuvi, co vimbunge vyavo vyashula nakukwisa simbu yoshe.”