Yombi 14 - Livulu lya Shukulu Kalunga

¹ “Munu woshe wakusemuka ku munakazi, matangwa endi apwa amandondo, ashula na tuyando.

² Tulinakukola nakujujwama vwasi ngwe vishani, co tuzimuka ngwe munzinze.

³ Kuma Njambi, ukakenga ali yange, nakunjisompa mu mbanja ndi?

⁴ Cuma nacimo cai cakujela citunda ku cuma cakujeneka kujela ngwe munu.

⁵ Simbu yakuyoya kwendi vanaiseteka laja, nakutuma kwa vingonde vyendi vili kuli yove. Nginga yendi unaitu laja ngeci kasa kuyijomboka.

⁶ Mu ngila eyi, mwecele ngeci ahwime, co museze endi lika ajolele, ngwe muka-kupangela fweto ajolela, omo amanesa vipangi vya litangwa lije.

⁷ “Kucili cinyangavili ku muti omwo vaushinja, co ujovelela lalo, na munango wawo wa njovolwezi ukajovelela.

⁸ Nameme mizi yawo ikolela mu livu, co nsina yawo yumina mu livu,

⁹ oloni omo uziva vutonwezi vwa mema, co ujovelela ngwe muti wauha.

¹⁰ Nga munu atsa, co kuli ikeye vinahuko, omo atula mwonyo, co ali kulijo?

¹¹ “Ngwe muje muwakomu mema a mu ndonga, co mema alikungiya amo nakuma,

¹² vanu vakatsi, co kuvesi kwinduka lalo, co kuvakenduka lalo noo melu akahwa, co kuvakakasumuka mu tulo twavo embwe.

¹³ Nga unatavele kunjishweka mu lifuti lya vatsi, ngeci njivandemo noo vukalu vwove vuneti, nakunjitumbwila simbu yakunjanuka.

¹⁴ Nga munu atsa, kuma asa kuyoya lalo ndi? Oloni njikavandamena visimbu vyavivwa, njikavandamena noo simbu eyi ya tuyando inahu.

¹⁵ Ukanjisana, co njikakutava, co nove ukashaka kutumama nange, munu uje iwatangele.

¹⁶ Asinoni ukalava manambo ange, oloni kuukalandula vivi vyange.

¹⁷ Ukavisambesa nakuvyumbila kulyala, ukazimangana kupenga-penga kwoshe kunjalingi.

¹⁸ Simbu ikaija omo minkinda ikawa, na mamanya akatunda mu myela yayo.

¹⁹ Co mema aliwisa mamanya, na nyonzi yakama ikasindumwina livu kulyala, ngecivene, unyongesa cinyangavili ca munu.

²⁰ Yove uhyana munu, co ikeye aitilila myaka yoshe, utengulula cihanga cendi nakumutuma kweka.

²¹ Vana vendi nambe vavasingimika, ikeye kacizivuka, nambe vavashaula, ikeye kacimono.

²² Ikeye aziva lika kuvavala mu muvila wendi, nakuviilila mu mbunge yendi.”