Yombi 13 - Livulu lya Shukulu Kalunga

¹ “Mesho ange anamono vyoshe evi, na matwi ange anazivisisa. Vyuma vyoshe viwunendeka, yange njavizivile laja.

² Vije vimuzivuka, nange lalo njivizivuka. Kesi njiwangoco kuli yeni.

³ Oloni njishaka kwendeka kuli Muka-nzili yoshe. Co njishaka kulihozola na Njambi a mulonga wange.

⁴ Yeni mu vaka-kumanga vya makuli, mwapwa ngwe vimbanda va makuli vaje kuvasa kukangwisa vanu.

⁵ Mwamuvwa kwoloka, co cikamwesa ngeci mu vaka-kunyanyama!

⁶ “Tolilileni viyongola vyange, co zivilileni vin̄anda vitunda mu kanwa kange.

⁷ Omwo vikajo mwendekela makuli ali Njambi? Nakuvanda cimbango ali ikeye?

⁸ Yeni mukamwimanena ndi? Kuma mukasompela mulonga wendi ku mbanja ndi?

⁹ Nga Njambi akengesesa manene ali yeni, kuma akawanamo cuma cimo cacivwa muli yeni ndi? Kuma mwayongola ngeci mwasa kukwisa Njambi ngwe mumukakwisa vanu ndi?

¹⁰ Nameme kusompa kweni kunapu kwa mu vushweke, oloni ikeye akamyendekelako,

¹¹ co nzili yendi ikamizivisa lyova.

¹² Visimo vyeni vinapu vyangoco ngwe lito, co vimata vyeni vinapu ngwe livu lya vuma lyakuvujuka.

¹³ Munapande kwoloka kuluu, njeceleni yange njendeke, co vije vishaka kunjiwana, vinjiwane ngano.

¹⁴ “Omwo vikajo njiitikisamo mwonyo wange?

¹⁵ Cinyangavili cange coshe cinahu, ngecivene, nga Njambi anjitsiya, co kuli mulonga ndi? Yange njilinakwambulula mulonga wange kuli ikeye.

¹⁶ Eci lalo cikapwa ngeci kusimpa kwange kukanjamena, omwo kukwesi munu muka-vuvi uje asa kusimpa ku kenga kuli Njambi.

¹⁷ Co tolilileni ku majwi ange omo njiwalumbununa.

¹⁸ Yange njalivwaesela cimweja kwambulula mulonga wange, omwo njazivuka ngeci njili mu vushunga.

¹⁹ “Njambi, unjana mulonga ndi? Nga ngoconi, co njikoloka na kutsa.

²⁰ Njambi njitave njilombe vyuma vivali, kunjikakushwekelavyo embwe,

²¹ likele kunjihisa, kesi unjitsene nakunjizivisa lyova.

²² “Yove Shukulu Njambi endeka akulivanga, co yange njikakumbulula. Nambe njitave njendeke, co yove unjikumbulule.

²³ Vivi vyange vinapu vikajo? Co kuviya mukajo cinjinalingi? Milonga mukajo unjisompa nayo?

²⁴ “Omwo vikajo unjivandesela cihanga cove? Omwo vikajo unjiyongola ngwe nji citozi cove?

²⁵ Yove ulinakweseka kunjizivisa lyova ndi? Yange njiwangoco, njinapu ngwe liputa, ulinakulwisa mpindi ya cishati cakuma.

²⁶ “Kusompa kwove kwakunjilwisa kunapu kwakukalu, nameme vije vinjalingile omo njapwile mukwenje.

²⁷ Yove wakutu malyenge ku mendi ange, ulinakwilula linambo lyoshe njilinakwenda, co lalo ulinakwilula mwanja wange.

²⁸ Omwo cuma eci, yange njinafu ngwe vungululu vwa citale cakuvola, ngwe kazaku kakuliwa ku vimenzi.