Yombi 12 - Livulu lya Shukulu Kalunga

Yombi

¹ Co Yombi wakumbulwile ngwendi,

² “Kukwesi vimata vyai, yeni vene vanu vaje, omo mukatsa, co mana akahwa.

³ Oloni nange njili na mana ngwe yeni, kumwanjituvakanene embwe. Iya kazivuka vimunendeka?

⁴ Nameme vasamba vange valinakunjijola ololo, valinakujola, nameme nji muka-vushunga na muka-kujeneka mulonga, oloni kwakele simbu imo omo Njambi wakumbulwile malombelo ange.

⁵ Yeni kumwesi mu tuyando embwe, oloni mulinakunjishendumuna, mupupa munu uje ali kuyehi nakuwa.

⁶ Oloni vezi na vaka-vuvi valinakuyoya mu kwoloka, nameme nzili yavo vavenya, ikeyo vapwisa njambi yavo.

⁷ “Nameme tuzila na tusitu vali na vyavingi vyakumilongesa,

⁸ lombeni mana ku vikashama va mu kaye na ku vikashama va mu mema a kalunga.

⁹ Vyoshe vizivuka ngeci livoko lya Shukulu Kalunga likelyo lyavipangele.

¹⁰ Njambi lika ikeye atwamenena myonyo ya vitanga vyendi, mwonyo woshe wa munu wakala mu livoko lyendi.

¹¹ Ngwe ndaka yeni ijolela kumakela vyakulya, co matwi eni ajolela kuziva majwi.

¹² “Tukulukazi vakala na mana, oloni Njambi wakala na mana na nzili.

¹³ Tukulukazi vakazivisisa, oloni Njambi akazivisa, co wakala na nzili yakulinga cuma.

¹⁴ Omo Njambi asiwula, iya asa kutungulula? Co iyajo asa kushokolola munu uje yanashokela Njambi mu kamenga?

¹⁵ Omo Njambi avindika nyonzi kunyoka, co lilanga liija, omo anyokesa nyonzi, co livazi linyongesa kaye.

¹⁶ Njambi wapwa Muka-nzili, co simbu yoshe muka-kuhyana, munu uje ivanakwisa na munu uje akwisa mukwavo, voshe vanapu vanu va Njambi.

¹⁷ Ikeye akatundisa mana a vaka-kushwana, co apangesa vantwama ngwe vilema.

¹⁸ Ikeye akatundisa vimyene a matanda, nakuvapwisa vinzinda,

¹⁹ ikeye ononwesa vaka-kukombelela, co awisa vaka-nzili.

²⁰ Ikeye olwesa vanu vaje vavanakulaela, co akatundisa mana a vakulunu.

²¹ Ikeye akazivisa shwamwa vanu vaje valinakushwana, nakumanesa nzili ya vaka-kushwana.

²² Ikeye afukula vyuma vyakulova vya mu lisusulungu, nakutengulwila lisusulungu lyakama ku ceke.

²³ Ikeye akolesa miyati ya vanu, co avanyongesa, aamesa miyati ya vanu, co avatwala ku vunzinda.

²⁴ Ikeye atundisa mana ku vantwama va asi, co avendesa mu mambo mwakujeneka ngila.

²⁵ Co vapapateya mu lisusulungu mwakujeneka ceke, co avapelyanganesa ngwe vaka-kupenda.