Yombi 11 - Livulu lya Shukulu Kalunga

Zofale

¹ Co Zofale kaNamate wakumbulwile ngwendi,

² “Kuma kwendeka manene cishungamesa munu ndi?

³ Yombi, kuma yove wayongola ngeci kesi tukukumbulule ndi? Kuma kujokota kwove kwasa kwolwesa vanu ndi? Omo ushendumuna vanu kuma kuvakuzivisa shwamwa?

⁴ Yove ngwove vyendeka vyove vya vushunga, co unendeka lalo ngwove uwakujela ku mesho a Njambi.

⁵ Nga Njambi atava ngeci akukumbulule!

⁶ Nga nakuleka omwo kuyili mitambela ya vaka-mana, co kuvili vyuma vyakulova manene kuli munu vije kasa kuzivuka. Njambi alinakukuhisa kamandondo lika kutuvakana milonga yove.

⁷ “Yove wasa kuwana vyuma vyakulova vya Njambi ndi? Wasa kuwana aje ahwila vukama vwa Njambi Muka-nzili yoshe ndi?

⁸ Livu kulyesi naa alyahwila kuli Njambi, oloni lyalova kutuvakana mana ove. Njambi azivuka lifuti lya vatsi, oloni yove kuulizivuka.

⁹ Njambi wapwa wakama kutuvakana kaye, co wajanjavala kutuvakana mema a kalunga.

¹⁰ Nga Njambi akukwata nakukusompa, iyajo asa kumuvindika?

¹¹ Njambi azivuka vanu vaje vanapu vangoco, ikeye amona vilinga vyavo vyoshe vyavivi.

¹² Cinapu cacikalu ku vilema kukala na mana ngwe mucapwa cacikalu ku vingolo kusema vimulu.

¹³ “Yombi, kundika mbunge yove kuli Njambi. Co olwela mavoko ove kuli ikeye.

¹⁴ Tundisa vuvi na kupenga-penga ku njuvo yove.

¹⁵ Mwa vushunga asinoni ukandula mesho ove shwamwa, co ukemana mbe kwa lyova.

¹⁶ Asinoni ukevala tuyando twove, ukatwivala ngwe njozi ije ineti laja.

¹⁷ Mwonyo wove ukavyazima kutuvakana misha ya akati ka litangwa, nameme kukakala lisusulungu, oloni likatwa ngwe ceke ca mutondo.

¹⁸ Co ukayoya mwamuvwa nakushula na cinyangavili, Njambi akakunyunga, nakukwana kuhwima.

¹⁹ Kuukatewe vitozi vove embwe, vanu vavangi vakakulomba ngeci uvakwase.

²⁰ Oloni mesho a vaka-vuvi akonwa, co kuvakawana oku vakatewela. Kuvakakala na cinyangavili, oloni vakatsa.”