Yombi 10 - Livulu lya Shukulu Kalunga

¹ “Njajuka kuyoya. Njikalyendekela kukulinyenga kwange. Njikendeka vyakulinyenga vije vili mu mbunge yange.

² Njikendeka kuli Njambi ngwange kesi unjihise. Njileke! Vikajo unjilwisila?

³ Kuma mwamuvwa kuli yove kuyandesa nakuyeluwisa vije watangele yove vavenya ndi? Nakujolela viyongola vya vanu vaka-vuvi?

⁴ Kuma yove uli na mesho a vusitu? Indi ukamono ngwe muvakamono vanu?

⁵ Matangwa ove analifu ngwe matangwa a munu ndi? Nambe myaka yove inalifu ngwe myaka ya munu ndi?

⁶ Ngeci utondesese milonga yange nakukon̄a vuvi vwange.

⁷ Nameme uzivuka ngeci kunjesi na mulonga, ngeci naumo wai asa kunjamena ku livoko lyove.

⁸ Mavoko ove anjimungile nakunjipanga, co ololo mavoko aje vene alinakunjinyongesa.

⁹ Anuka ngeci wanjimungile ngwe vuma, co ushaka kunjitsena nakunjiilwisila lalo ku livu ndi?

¹⁰ Yove waanene tate nzili yakunjikita, co wanjikolesele mwimo lya vanana.

¹¹ Yove wamungile muvila wange na vitsiya na mishisha, nakufwika vitsiya mishuni na cikonde.

¹² Yove unanjana mwonyo na cizemo cije kucesi kutenguluka, co unanjinyungu ngeci njiyoye.

¹³ Oloni ololo njazivuka ngeci visimbu vyoshe vije wakele na vutumbe vwa mu vushweke vwakunjivulumuna.

¹⁴ Wakele nakunjinyungilila kumona nga njilinga vuvi, ngeci uvyane kunjisambesa.

¹⁵ Nga njilinga vuvi, njinapu munu wakuvindama, nambe nga njiwakushungama, kunjikasa kwandula mutwe wange omwo njili na shwamwa yakama.

¹⁶ Nga yange njivezika, co yove unjiyomba ngwe ndumba mwakayombo kasitu, co ulisholola lalo kupwa muka-kulinga vikomokeso ali yange.

¹⁷ Simbu yoshe uli na vakaleo vaka-kunjilwisa, vukalu vwove kuli yange vulinakutwalao, simbu yoshe uli na vutumbe vwavuhwa vwakunjilwisa.

¹⁸ “Omwo vikajo Njambi watavele ngeci yange njisemuke? Njapandele kutsa kunjimona ku munu.

¹⁹ Nga njapwile ngwe njiwaiko, nakunjitundisa mwimo kunjitwala ku mbumbo.

²⁰ Kuma matangwa akuyoya kwange kuwahwile ndi? Njecele ngeci njivwaelele kamandondo.

²¹ Ololo njilinakuya, co kunjikeluka lalo, njiya ku lifuti lya lisusulungu lyakuzivala vwii,

²² lifuti lya lisusulungu, na munzinze, na vukalu, kuje ceke calyo capwa lisusulungu.”