Yakomba 5 - Livulu lya Shukulu Kalunga

Kunangula vaka-kufuka

¹ Co yeni vanu vaka-kufuka, tolilileni kuli yange! Lileni nakumbolozoka a n̄avava ije ilinakwija ali yeni!

² Vufuko vweni vunavolo laja, na vuzalo vweni vunaliwa ku tunembulu.

³ Ngolinde yeni na siliva yeni vinaliwa ku n̄alawe, n̄alawe eyi ikapwa vukaleo kuli yeni, co vikalya situ yeni ngwe tuhya. Yeni munalilundikila vufuko mu matangwa ano akumanesela.

⁴ Yeni kumwafwetele vaje vaka-kumipangela mu mahya eni. Ziveni kuteta kwavo! Miteto ya vaje valinakumitejela vimbuto vyeni inete ku matwi a Njambi, Shukulu Kalunga Muka-nzili yoshe!

⁵ Kuyoya kweni kwa ano asi kunapu kwa mbwase nakuvwaelela. Munalinunisa yeni vavenya ku litangwa lyakumitsiya.

⁶ Munahisa nakutsiya vanu vaka-vushunga, co kuvamivyanene.

Kusimpa nakulombela

⁷ Ngecivene, pweni vaka-kusimpa, vasamba vange, noo Mwene akaija. Kengeni kusimpa kwa ndimi omo avandamena lihya lyendi limene vimbuto vyavivwa. Akavandamena noo na ku nyangao na ku simbu ya ndombo.

⁸ Neni lalo pweni vaka-kusimpa! Nyungeni cinyangavili ceni ngeci ciye kulutwe, omwo litangwa lyakwija kwa Mwene lili kuyehi.

⁹ Kesi mulinyenge umo na mukwavo, vasamba vange, ngeci Njambi kesi akamisompe. Lyaako ali kuyehi, ololo vene asholoka.

¹⁰ Vasamba vange, anukeni vaka-kwimanena vaje vendekele mu lizina lya Mwene. Vakengeni nakutembunwina kusimpa kwavo kuvakele nakwo a simbu ya n̄avava.

¹¹ Tulinakuvatumbula vaka-kuvwaelela omwo vakevo vakele na lukakateya. Mwaziva laja akusimpa kwa Yombi, co mwazivuka vika Mwene waanene kuli Yombi akukotoka. Omwo Mwene muka-kutetela na mema ku mbunge.

¹² Oloni a vyoshe evi, vasamba vange, kesi mulisinge omo mulinga cikumiiyo. Kesi mulisinge na lilu nameme na asi nameme na cuma coshe-icoshe. Oloni, “Eyo yeni ipwe eyo omwo munatava,” nambe “Embwe embwe yeni ipwe embwe omo munavyana,” nga ngoco, co vaka-nyanyamesa kuli Njambi.

¹³ Kwali umo akati keni alinakuyanda ndi? Napande kulomba. Kwali umo alinakuvwaelela ndi? Napande kwimba vishangazala.

¹⁴ Kwali umo akati keni alinakuvinja ndi? Napande kusana vakulunu va cikungulukilo, co vamulombelele nakumuvwavesa mazi mu lizina lya Mwene.

¹⁵ Co kulomba oku mukukulaela kukovola uje muka-kuvinja, co Mwene akamukangwisa, nga ikeye nalingi vuvi, co vakamusambesa.

¹⁶ Ngecivene, litaveleni vivi vyeni kuli umo na mukwavo, co lilombeleleni umo na mukwavo, ngeci vamikangwise. Lilombelo lya munu muka-vushunga lili na nzili manene mukupanga.

¹⁷ Elinja wapwile munu mu cifwa ngwe yetu vene. Walombelele manene ngeci nyonzi kesi inyoke, co nyonzi yalikelele kunyoka a myaka itatu na vingonde vitanu na imo.

¹⁸ Walombelele lalo, co nyonzi yanyokele, co asi amenene vimbuto.

¹⁹ Vasamba vange, nga umo weni ongumuka kutunda ku vushunga, co weka amwilwisa lalo,

²⁰ anukeni cuma eci ngweni, woshe uje elwisa muka-vuvi ku kupenga-penga kwendi novola mwonyo wa uje muka-vuvi kutunda ku kutsa, co vuvi vwavungi vakavusambesa omwo ikeye.