Yakomba 4 - Livulu lya Shukulu Kalunga

Vusamba na kaye

¹ Kulilwisa kwoshe na vimata vyoshe akati keni vilinakutunda kuli? Vilinakutunda ku mashungu eni aje simbu yoshe alinakulwa mu mivila yeni.

² Mushaka kukala na vyuma, oloni kumwasa kuviwana, ngecivene, mutsiya, muliveyela vyuma, oloni kumwasa kuviwana, co mulinga vimata nakulilwisa. Kumwesi kuwana vije vimushaka omwo kumwesi kuvilomba kuli Njambi.

³ Co nameme munalombo kumwasa kuvitambula, omwo viyongola vyeni vyapwa vyavivi, mukalomba vyuma ngeci mulikwase ku senga yeni vavenya.

⁴ Yeni vanu vakwonwa kulongwa! Kuma kumuzivuka ngweni vusamba na kaye vwapwa vutozi kuli Njambi ndi? Woshe uje ashaka kulipwisa musamba wa kaye nalipwisa ikeye vavenya citozi ca Njambi.

⁵ Kesi muyongole ngweni visoneka vilinakwendeka makuli omo vyendeka ngwavyo, “Munzinzime uje yanaka Njambi muli yetu washula na mashungu a muuka.”

⁶ Oloni kutetela kwa Njambi kwanatwana kwapwa kwa nzili manene. Ngwe muvyendeka visoneka ngwavyo, “Njambi avyana vaka-kulyalesa, oloni atetela vaka-kulikeesa.”

⁷ Ngecivene, ononokeni kuli Njambi. Vyaneni Liyavola, co akamijejuka.

⁸ Shwenyeni kuyehi na Njambi, co na ikeye lalo akashwenya kuyehi neni. Jweleseni mavoko yeni, yeni vaka-vuvi! Jweleseni vimbunge vyeni, yeni vaka-civembulu!

⁹ Pweni vaka-kuviilila, tambekeni, lileni, tengulukeni kujolela kweni kupwe kulila, kujolela kweni kupwe kulisimoka!

¹⁰ Likeeseni yeni vavenya ku mesho a Njambi, co ikeye akamijundula.

Kunangula a kusompa musamba wove muka-Yesu

¹¹ Vasamba vange, kesi mulizungise umo na mukwavo. Woshe uje afweya nambe asompa mukwavo muka-Yesu alinakuzungisa Lishiko nakulisompa. Nga usompa Lishiko, co yove lalo kuwapwile u munu muka-kwononoka Lishiko, oloni unapu u muka-kulisompa.

¹² Njambi ikeye lika muka-kwana lishiko na lyaako. Ikeye lika muka-kwamena na muka-kunyongesa. Yove iyajo ngeci usompe mukweni?

Kunangula a ngila ya kulyalesa

¹³ Co ololo tolilileni kuli yange, yeni mulinakwendeka ngweni, “Lelo nameme imene tukaya ku nganda yacingandi, kuje tukakala mwaka woshe wa mutunu nakunganyala nakuwanako vimbongo vyavingi.”

¹⁴ Yeni kumwazivukile ngweni mwonyo weni ukafwa vati ku litangwa lya imene! Omwo yeni munapu ngwe mbundu, ije isholoka kasimbu kakandondo lika, co inyonga.

¹⁵ Ngecivene, munapande kwendeka ngweni, “Nga cizango ca Mwene citava, co tukayoya nakupanga eci na cije.”

¹⁶ Oloni yeni mukalyalesa nakulishasha, kulyalesa kweni kwoshe kunapu kwangoco.

¹⁷ Ngecivene, munu woshe uje azivuka kulinga mwamuvwa oloni kalingimo, ali na mulonga wa vuvi.