Yakomba 3 - Livulu lya Shukulu Kalunga

Ndaka

¹ Vasamba vange, kucapandele muvavangi mupwe mu valongisi. Omwo mwazivuka ngweni yetu valongisi vakatusompa manene na vukalu kutuvakana veka.

² Omwo yetu voshe visimbu vyavingi tukaviisa. Oloni nga munu kesi kuviisa muvyendeka vyendi, co napu munu wakujela, co asa lalo kulinyunga ikeye vavenya.

³ Tukaaka vikuvo mu tunwa twa tuvalu ngeci vatwononoke, co tukavatwala kwoshe kuje kutushaka.

⁴ Nambe yongoleni a mato akama a mu mema a kalunga, nameme apwa akama manene, oloni akongumuka na nzili yakama ya lihunzi, vakawajavwisa na cikasi cimo cacindondo cakulipasha, co uje muka-kujavula awatengulula kwoshe kwashaka kuya.

⁵ Co na ndaka mukemwo muyafwa, nambe yapwa yaindondo, oloni yasa kulyalesa a vyuma vyakama manene. Co yongoleni shwata yakama-kama oloni yasa kwenya na kamulangi ka tuhya kakandondo!

⁶ Co ndaka inapu ngwe tuhya. Inapu ngwe kaye ka vuvi, kanashwana mu mivila yetu nakushandwela vuvi mukuyoya kwetu kwoshe! Ishwameka yoyesi yetu yoshe na tuhya tuje tutunda mu mbulu ya tuhya.

⁷ Munu asa kwononwesa, co nononwesa laja vikashama vavangi, tusitu na tuzila, nevi vyakulikoka na visi.

⁸ Oloni naumo wai asa kwononwesa ndaka. Ikeyo yapwa yaivi, kuyitava kuyononwesa, yashula na vushungu vwa kutsa!

⁹ Tuyipangesa mukukandelela kuli Mwene yetu na Tatetu, co na ikeyo lalo itukasingi nayo vakwetu vanu, vaje vavatangele mu cifwa ca Njambi!

¹⁰ Majwi akukandelela nawa a cisingo oshe akatuuka mu kanwa kamolika. Vasamba vange, vyuma evi kuvyapandele kulingiwa!

¹¹ Kuma lisima lya kavwelu-vwelu limolika mukatuuka mema akulula na mema amavwa ndi?

¹² Vasamba vange, kuma muti wa mukuyu wasa kwima olive ndi? Nambe mukolovozi wa vushuka vwa vinyu wasa kwima mikuyu ndi? Nambe lisima lya mema a mwongwa lyasa kutuula mema akutovala ndi?

Mana akutunda kwilu

¹³ Kuma akati keni ali muka-mana na muka-kuzivisisa ndi? Ikeye napande kuwajombolola na vukaleo vwakuyoya kwendi kwakuvwa na vilinga vyendi vya cifwa cakulikeesa na mana.

¹⁴ Oloni nga mu mbunge yove mwakala lifuwa na vukalu na kulizema yove vavenya, co kesi ulwise vushunga mu kulyalesa a mana ove.

¹⁵ Mana a cifwa cangacije kuwatundile mwilu embwe, awa akundama ku vya kaye, akewo kesi a ku munzinzime oloni a ku minzinzime yakujwala.

¹⁶ Kuje kwoshe kwakala lifuwa nakulizema yove vavenya, co kwakala lalo kuviya na vuvi vwoshe.

¹⁷ Oloni mana akutunda mwilu akulivanga apwa akujela, co apwa a kwoloka na vuvwa na vusamba, ashula na mema ku mbunge, co akasholola kuteja kwakuvwa kwa vilinga vyavivwa, co kuwakele na cizindo nameme na civembulu.

¹⁸ Vaka-kwoloka vaje vakuna vimbuto mu kwoloka vakateja vimbuto vyakushungama.