Yakomba 2 - Livulu lya Shukulu Kalunga

Kunangula a kumwesa kaangu

¹ Vasamba vange, akupwa mu vaka-kukulaela kuli Mwene yetu Yesu Kilistu, Mwene wa vumpau, kumwapandele kumwesa kaangu ku vanu ngwe ku cifwa cavo ca anja embwe.

² Omo nga mumona munu muka-kufuka nazala kanzeya ka ngolinde na vuzalo vwavuvwa akovela mu cikungulukilo ceni, co lalo kautu akovelamo na vuzalo vwa visanyu-sanyu,

³ nga musingimika manene uje munalume nazala mwamuvwa, co mwendeka kuli ikeye ngweni, “Mwane, tumbameni mu citumbamo cacivwa eci,” oloni mwendeka kuli kautu ngweni, “Ove, imana oko, ” nambe ngweni, “Tumbama asi ku myanja yange,”

⁴ co muli na mulonga wa kaangu akati keni nakusompa mu ngila ya viyongola vyavivi.

⁵ Tolilileni, vasamba vange vanjazema! Njambi waangwile tuutu mu kaye kano ngeci vapwe vaka-kufuka mukukulaela, co vakashwane vumwene vuje vwakulaesele kuli vaje vamuzema.

⁶ Oloni yeni muyengula tuutu! Veya vaje vakamiyandesa nakumikokela ku mesho a maako? Kuma kesi vaka-kufuka ndi?

⁷ Vakevo vakendeka vyavivi a lizina lyalivwa lije vanamyana.

⁸ Mulinga cuma cacivwa nga mwononoka lishiko lya Vumwene, lije tuwana mu visoneka ngwavyo, “Zema mukweni ngwe muwalizema yove vavenya.”

⁹ Oloni nga mupangesa vanu ngwe ku cifwa cavo ca anja, co muli na mulonga wa vuvi, co Lishiko lilinakumihisa ngwe yeni munapu vaka-kulipokola.

¹⁰ Omwo nga munu apokola lishiko limo, co ali na mulonga wakupokola mashiko oshe.

¹¹ Omwo uje wendekele ngwendi, “Kesi ulinge vupangala,” wendekele lalo ngwendi, “Kesi utsiye.” Nameme kuwesi kulinga vupangala, unemuka muka-kupokola lishiko nga utsiya munu.

¹² Ngecivene, endekeni nakulinga ngwe vanu vaje vavakasompa na lishiko lije likatupatula.

¹³ Omwo Njambi kakasholola kutetela kwendi omo asompa munu uje kesi kutetela vakwavo, oloni kutetela kukekwo kwakama kutuvakana kusompa.

Kukulaela na vilinga

¹⁴ Vasamba vange, vuvwa mukajo nga munu endeka ngwendi, “Nji muka-kukulaela” nga vilinga vyendi kuvisholola vukaleo vwakukulaela? Kuma kukulaela oku kukamwovola ndi?

¹⁵ Nga ndolome nambe ndokazi vaje vanajeneka vuzalo, co kuvesi na vyakulya,

¹⁶ Vuvwa mukajo vuliho nga wendeka kuli vakevo ngweni, “Njambi amivezikise! Kaleni na ntwima, co lyeni mwamuvwa!” Nga kuuvana vyuma vije vashaka mukuyoya?

¹⁷ Eci cinapu mumo nakukulaela, nga cili acolika kujeneka vipangi, co cinatsi vene.

¹⁸ Oloni umo endeka ngwendi, “Munu umo muka-kukulaela, mukwavo muka-vipangi.” Kukumbulula kwange kunapu oku, “Njileke vatijo munu asa kupwa muka-kukulaela kujeneka vipangi. Yange njikumwesa kukulaela kwange a vipangi vyange.”

¹⁹ Unakulaela ngwove kwali Njambi umolika ndi? Mwamuvwa! Na minzinzime yakujwala lalo inakulaela, co ikajaja na lyova.

²⁰ Ove cilema! Kuma ushaka vakumwese ngeci kukulaela kukwesi na vipangi kunapu kwangoco ndi?

²¹ Vatijo kukulwila yetu Avilahama vamupwisile muka-vushunga ku mesho a Njambi? Eci capwile caa vilinga vyendi, omo wakombelele munendi Isake a mutula.

²² Kuma kumwasa kumona ndi? Kukulaela kwendi na vilinga vyendi vyoshe vyapangele amo, kukulaela kwendi vacipwisile cakutungukwa a vilinga vyendi.

²³ Co Visoneka vyapwile vya vushunga vije vyendekele ngwavyo, “Avilahama wakulaelele Njambi, co omwo akukulaela kwendi Njambi wamulaveleleco kupwa vushunga.” Co Avilahama vamutumbwile musamba wa Njambi.

²⁴ Ngecivene, tumona ngeci munu vanamupwisa muka-vushunga ku mesho a Njambi a vilinga vyendi, co kesi omwo akukulaela kwendi akwolika embwe.

²⁵ Capwile cuma cimolika na Lahave uje cikwizi. Vamupwisile muka-vushunga ku mesho a Njambi omwo a vilinga vyendi, akutambula mwamuvwa vaje vaIsalele vaka-kunenga nakuvakwasa ngeci vatewe valikwasese ngila ikwavo.

²⁶ Ngecivene, nga muvila kuwesi na munzinzime, co unatsi, nakukulaela lalo nga kukwesi na vilinga, co kunatsi.