Yakomba 1 - Livulu lya Shukulu Kalunga

¹ Mukanda wakutunda kuli yange Yakomba, ngamba ya Njambi na Mwene Yesu Kilistu. Viindu kuli vanu voshe va Njambi vaje vanashandokela mu kaye mwoshe.

Kukulaela na mana

² Vasamba vange, liyongoleni yeni vavenya ngweni mwavezika omo vyeseko vyavingi vilinakwija kuli yeni,

³ omwo munazivuka ngweni kweseka kwakukulaela kweni kulingisa lukakateya.

⁴ Co lukakateya lweni lumyetese na ku shongo kujeneka kwonwa, ngeci mupwe vakujela vamutunu, nakujeneka cuma cimo.

⁵ Oloni nga kuli umo weni najeneka mana, alombe kuli Njambi, uje akamwanawo, omwo Njambi akana kuli vanu voshe nakushemutuka na kutetela.

⁶ Oloni nga ulombela, unapande kukulaela kesi ushame-shame embwe. Omwo woshe uje ashama-shama napu ngwe linkimba lya mu mema a kalunga lije lipekumukila kwoshe kuje kuliya lihunzi.

⁷ Omwo munu wa cifwa cangacije kesi ayongole ngwendi akatambula cuma cimo kuli Mwene.

⁸ Munu wa vimbunge vivali akapelyangela mu vingila vyendi vyoshe.

Vuutu na vufuko

⁹ Vaka-Yesu vaje vanapu tuutu vanapande kuvwaelela omo Njambi avajundula,

¹⁰ co vaka-Yesu vaje vanafuku vanapande kuvwaelela omo Njambi avakeesa. Omwo vaka-kufuka vakapekumuka ngwe vishani vya muti.

¹¹ Omo litangwa lituuka na misha yalyo ya ntwima nakujujwamesa mwila, co vishani vyakwo vitotomoka na vuvwa vwavyo vunyonga. Ngecivene, mu cifwa cimo vene muka-kufuka akanyonga omwo acitwalelelao mu vilinga vyendi.

Vyeseko vinena vivezikiso

¹² Vanavezika vanu vaje valongwa a simbu ya vyeseko, omwo nga vahyana na kukakateya mu ceseko eci, co vakatambula mwonyo kupwa cikandelela cavo uje wanakulaesa Njambi kuli vaje vaazema.

¹³ Nga munu vamweseka na vyeseko vyangacije, co kapandele kwendeka ngwendi, “Vyeseko evi vilinakutunda kuli Njambi.” Omwo Njambi kucitava kumweseka na vuvi, co ikeye vavenya kesi kweseka munu naumo wai.

¹⁴ Oloni munu na munu amona vyeseko omo mashungu endi ikeye vavenya alinakumukoka nakumukwata.

¹⁵ Asinoni mashungu omo emita, co akita vuvi, co vuvi omo vunakolo, co vukita kutsa.

¹⁶ Kesi vamikwise, vasamba vange vanjazema!

¹⁷ Cashu coshe cacivwa na vwana vwoshe vwavuvwa vyatunda mwilu, vyatunda kuli Njambi, Ishamatanga wa vyeke vya mwilu, uje kesi kutenguluka nambe kunena lisusulungu akutenguluka.

¹⁸ Ku cizango cendi natutanga yetu a lijwi lya vushunga, ngeci tupwe mushoke wakulivanga akati ka vyoshe vije vyatangele.

Kuziva nakulinga

¹⁹ Anukeni eci, vasamba vange! Munu woshe napande kuzambula kuziva, oloni eshwale kukumbulula nakwishwala kuluvala.

²⁰ Omwo vukalu vwa munu kuvwesi kuvwaesa vutumbe vwa vushunga vwa Njambi embwe.

²¹ Ngecivene, umbileni kuti vyuma vyoshe vije vinapu vya mazilo na vilinga vyavivi. Likeeseni kuli Njambi nakutambula lijwi lije akuna mu vimbunge vyeni, lije lyasa kumyovola.

²² Kesi mulikwise yeni vavenya mukupwa vaka-kuziva lijwi lyendi lika, oloni pweni vaka-kulipangesa.

²³ Omwo nga mutolilila ku lijwi oloni kumulipangesa munapu ngwe vanu vaje valikengela a kalikengelo, co valimona muje muvafwa vakevo vavenya.

²⁴ Valikengelao, co vaya, co vwasi-vwasi vevala muje muvafwa.

²⁵ Oloni woshe uje akengesesa a mashiko akujela aje akapatula vanu, co uje kawatolilila lika asinoni awevala, oloni awapangesa, munu uje Njambi akamuvezikisa mu vyoshe vije alinga.

²⁶ Nga munu umo ayongola ngwendi ikeye muka-kulemesa, co kononwesa ndaka yendi, kulemesa kwendi kunapu kwangoco, co alinakulikwisa ikeye vavenya.

²⁷ Kulemesa kwakuvwa kuje kwanayongola Njambi Tate kukekwo oku, kulela visiwa na vifwile mu tuyando twavo nakulinyunga ikeye vavenya kutunda ku vyuma vya mazilo vya mu kaye.