Visimo 9 - Livulu lya Shukulu Kalunga

Mana na vulema

¹ Mana anatungu njuvo yawo, nakuyishongela vimanda vyayo vitanu na vivali.

² Mana anatsii tusitu twa a ciwano, co anatsingasana vinyu, nakujala mesa.

³ Akewo anatumu vangamba vendi va vambanda mukutambeka a mitambela yakulunduka mu vinganda ngwawo,

⁴ “Voshe vanu vakweeva vaije kuno!” Co ku vilema endeka ngwawo,

⁵ “Ijeni mulye ku vyakulya vyange nakunwa ku vinyu vinjinatsingasana.

⁶ Tundeni mu munga ya vanu vakweeva ngeci muyoye, co endeni mu ngila ya mana.”

Mana a vushunga

⁷ Nga unangula muka-kulyalesa, co ulinenela shwamwa. Nga wendekela muka-vuvi, ulipesa lika ngoco.

⁸ Kesi unangule muka-kulyalesa, akakuzinda lika ngoco. Oloni nga unangula munu wakunyanyama, co munu wa cifwa cangacije akakuzema.

⁹ Cuma coshe cije wendeka na munu muka-mana, cikamunyanyamesa. Vyoshe vije viwuleka muka-vushunga, vikawezelela ku mana endi.

¹⁰ Kwononoka Shukulu Kalunga, cikeco vushangumukilo vwa mana. Nga uzivuka Njambi Wakujela, co unapu muka-kuzivisisa.

¹¹ Mana akakuwezelela ku myaka yakuyoya kwove.

¹² Yove ukavezika nga ukakala na mana, oloni nga uwavyana, co ukapwa munu muka-kuyanda.

Cilanyo ca cilema

¹³ Kweeva kunapu ngwe munakazi wa kanwa, munakazi wa shwamwa.

¹⁴ Ikeye akatumbama ku cikolo ca njuvo yendi, nakutumbama a mwela wakulunduka wa mu nganda,

¹⁵ nakutambeka ku vanu vaje valinakwita nakuliila kwavo ngwendi,

¹⁶ “Yeni vilema, ijeni mukovele muno!” Co ku vanu vakweeva endeka ngwendi,

¹⁷ “Mema akwiva apwa amavwa manene, na likende lyakulila mu vushweke lyapwa lyalivwa manene.”

¹⁸ Vanu va luvinda kuvazivuka ngeci vanu vaje vakai ku njuvo yendi, vanatsi laja, vaje valivangele kukovelamo ololo vali mu vukalo vwa vatsi.