Visimo 8 - Livulu lya Shukulu Kalunga

Kushangazala mana

¹ Tolilila! Mana alinakusana. Kuzivisisa kulinakutambeka.

² Mana alinakutambeka oku anemana, akamwa ya malundu kuyehi na ngila, na a masambwa-ngila.

³ Mana anemana ku cikolo ca nganda, na kumukulo wa vikolo, alinakutambeka ngwawo,

⁴ “Njilinakumisana, yeni vanu voshe va ano asi.

⁵ Kanda mukole ndi? Lilongeseni kupwa ngwe vakulunu. Kuma mu vilema ndi? Lilongeseni kukala na mana.

⁶ Tolilileni ku majwi ange amavwa, vyoshe vinjimileka vinapu vya vushunga.

⁷ Simbu yoshe njikendeka vushunga, yange njazinda makuli.

⁸ Vyuma vyoshe vinjendeka vinapu vya vushunga, kunjekwendeka cuma ca makuli nambe kwendeka cuma cakumitanukisa embwe.

⁹ Oshe anapu majwi a vushunga kuli uje awazivisisa, co lalo amavwa kuli vaje vali na mana.

¹⁰ Angula vilongesa vyange na mana ange kutuvakana siliva, nambe ngolinde yaivwa.

¹¹ “Yange njapwa mana, njinatuvakana mamanya a seo, cuma nacimo cai cilyeseka nange.

¹² Yange njapwa mana, nji muka-kunongonona, njili na mana na kusompa kwakuvwa.

¹³ Kusingimika Shukulu Kalunga kukekwo kuzinda vuvi, yange njazinda kulyalesa nakulyaka ku vukama, njazinda lalo vingila vya vuvi na majwi a makuli.

¹⁴ Njikatumbu matumbe nakuwalinga, nji muka-kuzivisisa, co njapwa muka-nzili.

¹⁵ Njikakwasa vimyene kushwana, na vaka-kushwana kutunga mashiko amavwa.

¹⁶ Vaka-kushwana, na vaka-vulemu voshe va ano asi valinakushwana akukwasa kwange.

¹⁷ Njizema vaje vanjizema, voshe vaje vanjishakezeka vasa kunjiwana.

¹⁸ Njasa kwana vufuko na kasingimiko, vufuko vwa myaka yoshe, nakuvezika.

¹⁹ Vije uwana kuli yange vinapu vyavivwa kutuvakana ngolinde yaivwa, kutuvakana siliva yakujela.

²⁰ Njikende mu ngila ya vushunga, nakukava vingila vyakushungama,

²¹ njikana vufuko vwavungi kuli vaje vanjizema, nakushulisa vinjuvo vyavo na vufuko.

²² Akulivanga Shukulu Kalunga watangele yange, vikevyo vyapwile vipangi vyendi vyakulivanga vya ku san̄ulu.

²³ Yange vanjitangele avushangumukilo, simbu kanda vatange kaye.

²⁴ Njasemukile simbu kanda mema a kalunga akaleko, simbu masima a tuvwelu-vwelu akaleko.

²⁵ Yange njasemukile simbu kanda minkinda ikaleko, simbu kanda malundu vawatumbike mu myela yawo.

²⁶ Simbu kanda Njambi atange kaye na mahya amwo, nambe kutanga livu lya mu kaye.

²⁷ Yange kunjakele omo watumbikile lilu mu mwela walyo, omo wajangumwine lilu akamwa ya mema a kalunga.

²⁸ Njakele nendi omo waakele mashelwa mwilu, omo washokolwele masima a tuvwelu-vwelu, twa mema a kalunga,

²⁹ yange kunjakele omo watwile nginga ya mema a kalunga, ngeci mema a kalunga amwononokele. Yange kunjakele omo wajalele luvula lwa kaye.

³⁰ Njakele kuyehi na Shukulu Kalunga, ngwe munendi wamundondo, njamuvwaelelesele a litangwa na litangwa, co nange lalo njavwaelelele ku mesho endi,

³¹ njavwaelelele na kaye, co lalo njavwaelelele na vanu vamwo.

³² “Co ololo yeni vakwenje, tolilileni kuli yange. Lingeni ngwe muje njendeka, co mukavwaelela.

³³ Tolilileni vije njimilongesa. Pweni vaka-kunyanyama, co kesi muvyombwanese.

³⁴ Navezika munu uje atolilila kuli yange, munu uje atumbama ku cikolo cange, a litangwa na litangwa, munu uje avandamena ku cikolo ca ku njuvo yange.

³⁵ Woshe uje anjiwana awana mwonyo, co Shukulu Kalunga akavwaelela nendi.

³⁶ Woshe uje kanjiwana, alivulumuna lika ikeye vavenya, voshe vaje vanjizinda, vazema kutsa.”