Visimo 5 - Livulu lya Shukulu Kalunga

Kunangula a vupangala

¹ Munange, tolilila ku mana ange, zivisisa vije vinjendeka.

² Asinoni ukazivuka mwamuvwa kasingimiko, co majwi ove akamwesa ngeci kuma uli na mana.

³ Omwo majwi a munakazi wa cikwizi anapu akupwelelela ngwe vuki, akewo lalo apwa akuseneta kutuvakana mazi a olive,

⁴ oloni ku mamaneselelo majwi endi alula ngwe mwaze, nakuvambuka ngwe moko ya mukwale ya vuvela kuvali.

⁵ Nga umukava, akakushelumwisa kwisi ku vukalo vwa vatsi, ngila yakende ikeyo ngila itwala ku kutsa.

⁶ Munakazi ou kesi mu ngila ije itwala ku mwonyo, oloni alinakwendangana lika, kwakujeneka kunanguka vije vilinakulingiwa.

⁷ Co ololo njitolilileni yeni vana vange, munapande kulinga vyoshe vije njendeka.

⁸ Tundako ku munakazi wa cifwa cangacije! Kesi ushwenye nambe ku cikolo ca njuvo yendi.

⁹ Kutewa ukaana kasingimiko kove ku vakweni, co vaka-muuka vakakutsiya omo ucili uwamundondo.

¹⁰ Eyo, vangenzi vakambata vufuko vwove vwoshe, na vije viwunapangela vakavyambata vanu veka.

¹¹ Ukakemanga ku mamaneselelo a mwonyo wove, omo situ yove na muvila wove vikanyonga,

¹² co ukendeka ngwove, “Omwo vikajo njazindile kunjinangula? Omwo vikajo kunjatavelele ngeci munu anjendekele?

¹³ Kunjononokele lijwi lya valongisi vange, nambe kuvatolilila.

¹⁴ Oloni ololo njili na shwamwa ku mesho a vanu voshe.”

¹⁵ Pwa muka-kulongwa kuli munakazi wove, mwesa cizemo cove kuli ikeye lika.

¹⁶ Vana vaje uli navo kuli munakazi weka, kuvakakukwasa.

¹⁷ Vana vove vanapande kukola nakukukwasa, kesi vakwase vangenzi embwe.

¹⁸ Ngecivene, vwaelela nakujolela na munakazi wove uje iwambatele mu vukwenje vwove,

¹⁹ apwe wamuvwa kuli yove ngwe shonge. Vuvwa vwendi vukuvwaelelese, co cizemo cendi cikuzengeleke.

²⁰ Munange, omwo vikajo uzemena munakazi weka? Omwo vikajo uzema munakazi wa mukweni?

²¹ Shukulu Kalunga amona vyuma vyoshe vije viwulinga. Kwoshe kuje kuuya, alinakukumona.

²² Vaka-vuvi vatsa mu ciliva cavo vavenya. Vatsa mu linimbwa lya vuvi vwavo vavenya.

²³ Vaka-vuvi vatsa omwo kuvesi kulinyunga vakevo vavenya. Vulema vwavo vuvatwala ku mbumbo.