Visimo 4 - Livulu lya Shukulu Kalunga

Mana akwasa

¹ Vana vange, jendekeleni matwi eni kukunangula kwa ishweni. Tolilileni mwamuvwa ngeci muzivisise.

² Njilinakumyana vilongesa vyavivwa, co kesi museze kunangula kwange.

³ Omo njapwile mwana wa munalume, mwana wamundondo umolika kuli vanana,

⁴ tate wanjilongesele wendekele ngwendi, “Mbunge yove ikwate majwi ange, anyunge, co ukayoya.”

⁵ Tambula mana, tambula kuzivuka! Kesi uwevale nambe kutenguluka kutunda ku majwi a mu kanwa kange.

⁶ Kesi uvyane mana, akakwamena, azeme, co akakunyunga.

⁷ Vushangumukilo vwa mana vukevwo ovu, tambula mana, ku vyoshe vije utambula, tambula kuzivuka.

⁸ Zema mana, akakupwisa uwakama. Avumbatele, co akakusingimika.

⁹ Mana akapwa cilongo cacivwa ku mutwe wove, cilongo ca vumpau.

¹⁰ Munange tolilila kuli yange. Majwi ange akovele muli yove ngeci myaka yakuyoya kwove ikapwe yaingi.

¹¹ Njinakulongesa mu ngila ya mana, njinakutwamenena mu vingila vyakushungama.

¹² Omo wenda kuukatalyangela, omo ushatuka kuukatanuka embwe.

¹³ Kwatelela kunangula, kesi wecele! Cinyunge, cikeco mwonyo wove.

¹⁴ Kesi wende mu ngila ya vaka-kupenga-penga, nameme kuya mu ngila ya vaka-vuvi.

¹⁵ Litengeko, kesi uye ushwenye kuyehi nayo, tenguluka, ya mu ngila yove.

¹⁶ Omwo vaka-vuvi kuvesi kulala tulo kuvanga vanalingi cuma cimo cacivi, vakalala cilavu-lavu noo vanavulumuna munu.

¹⁷ Vakali kupenga-penga ngwe likende, vakanu muuka ngwe vinyu.

¹⁸ Ngila ivakende vaka-vushunga inapu ngwe kutuuka kwa litangwa lije litwa ceke noo lyalondo njamba.

¹⁹ Oloni ngila ya vaka-vuvi, inazivala vwii ngwe lisusulungu, vawila asi, oloni kuvamono vije vinavatanukisa.

²⁰ Munange, jendekela matwi ove kukunangula kwange. Tolilila majwi ange.

²¹ Kesi utave ngeci akuseze. Anuke nakuwanyunga mu mbunge yove.

²² Majwi awa akana mwonyo navukangule kuli munu woshe uje awazivisisa.

²³ Nyunga viyongola vyove, omwo viyongola vyove vikevyo kavwelu-vwelu ka mwonyo.

²⁴ Kesi wendeke cuma ca makuli. Kesi ulinge makuli nambe kwendeka majwi akutanganesa.

²⁵ Mesho ove akenge kulutwe lwove, kesi ukenge noku-noku.

²⁶ Zivuka kuje kuulinakuya, co ukemana a livu lyakukola.

²⁷ Kesi utunde mu ngila ya vushunga. Oloni tunda ku vuvi.