Visimo 31 - Livulu lya Shukulu Kalunga

Majwi akunangula mwene

¹ Awa akewo majwi a vaina ya Mwene Lemwele, aje avamulongesele.

² “Yove unapu munange injazema, yove wasemukile akunjimbulula ku malombelo ange. Tolilila mwamuvwa.

³ Kesi uviisile nzili yove ku vupangala, na vimbongo vyove vyoshe ku vanakazi, vakevo vananyongesa vimyene vavangi.

⁴ Ove Lemwele tolilila, vimyene kuvapandele kunwa vinyu, nambe vaka-kushwana kuvapandele kushungwiya kunwa vwala.

⁵ Omo vimyene vanwa vwala vevala mashiko, co kuvombuko mbunge ku vije vinapande vaka-kuyanda.

⁶ Vwala vanapande kuvunwa vanu vaje vashaka kutsa, nambe vanu vaje kuvesi lalo na cinyangavili.

⁷ Vanu va cifwa eci vanapande kunwa ngeci vevale vuutu vwavo, na tuyando twavo.

⁸ “Oloni yove unapande kwendekelako vanu vaje kuvasa kulyendekela vakevo vavenya. Nyunga vije vinapande kuli kautu na muka-kujeneka.

⁹ Vendekeleko nakusompa mwa vushunga. Nyunga vije vinapande kuli kautu na muka-kujeneka.”

Munakazi wamuvwa

¹⁰ Munakazi wa seo iyajo asa kumuwana? Seo yendi inatuvakana mamanya a lumbi!

¹¹ Munalume wendi wamukulaela, co kakapu kautu.

¹² Matangwa akuyoya kwendi oshe, akalingila munalume wendi vyuma vyavivwa, kesi vyavivi embwe.

¹³ Akakala na cipangi cakutonga maka a vimanga na vuzalo vwa linyu.

¹⁴ Napu ngwe vwato vwa vaka-kulandesa vuje vunena vyakulya vyendi kutunda kulyala.

¹⁵ Enduka omo kanda litangwa lituuke, mukuvwaesela naanga yendi vyakulya, nakuleka vangamba vendi va vambanda vije vivanapande kupanga.

¹⁶ Akulivanga ayongola mu mbunge yendi kulanda lihya na vimbongo vije vyakawana, co akunamo mikolovozi ya vushuka vwa vinyu.

¹⁷ Muka-kuundangana manene, muka-nzili nakupanga mwamuvwa.

¹⁸ Azivuka seo ya vyuma vyoshe vyalinga, co apanga na nzili noo mukati ka vutsiki.

¹⁹ Livoko lyendi limo nakwata citi cili na mukamango wa vwanda, co livoko lyendi likwavo nakwata limbambale lyakwombwesa vwanda.

²⁰ Ikeye wakala na cizemo kuli vaka-kuutwa, na kuli vaka-kujeneka.

²¹ Ikeye kesi kulinyenyeta omo kuli lisika, omwo naanga yendi vali na vuzalo vwa ntwima.

²² Akatongela vinanga a vulili, co akazala vuzalo vwavuvwa vwa linyu vwakuvenguluka.

²³ Munalume wendi vamuzivuka, omo akakala akati ka vakulunu va mu nganda.

²⁴ Munakazi ou akatongo vuzalo na miva, co avilandesa kuli vaka-kulandulula.

²⁵ Wapwa muka-nzili na kasingimiko, co kesi kulishoshomwena na vyuma vije vikaija kulutwe.

²⁶ Akendeka na lyovwa-ovwa na mana.

²⁷ Simbu yoshe muka-kuundangana, co akenga vije vanajeneka naanga yendi.

²⁸ Co vana vendi vakamwesa kuvwaelela kwavo, co munalume wendi amushangazala,

²⁹ nakwendeka ngwendi, “Vanakazi va seo vavangi, oloni yove u wa seo manene kutuvakana voshe.”

³⁰ Citso ca munu cikakwisa, na vuvwa vwa cihanga cendi vwapwa vwangoco, oloni munakazi uje asingimika Shukulu Kalunga vakamushangazala.

³¹ Mwaneni cikandelela a vije vyoshe vyakapanga. Vanu voshe vanapande kumusingimika.