Visimo 30 - Livulu lya Shukulu Kalunga

Majwi a Angule

¹ Awa akewo majwi a Angule muna Njake wendekele ngwendi, “Njambi kesi nange, Njambi kesi nange, co njinazeye.”

² Mwa vushunga njinapu nji cilema kutuvakana vanu voshe, kunjesi na mana a vunu.

³ Kunjalilongesele mana, co kunjizivuka Njambi mwafwa.

⁴ Iyajo wazivuka mana a mwilu? Iyajo wakwatele lihunzi mu livoko lyendi? Nambe kuzengela mema mu vuzalo vwendi? Nambe kutwa vinginga vya kaye? Nga kwali munu wangacije njilekeni lizina lyendi. Njilekeni lalo na lizina lya munendi.

⁵ “Vyoshe vije vyendeka Njambi vyapwa vya vushunga, wapwa ntelo ya vaje voshe vatewela kuli ikeye.

⁶ Kesi uwezelele ku majwi anendeka Njambi, kutewa akakuluvalesa, nakukupwisa munu wa makuli.”

Visimo vikwavo

⁷ Njilomba vyuma vivali kuli yove Njambi simbu-kanda njitse.

⁸ Njitundise makuli, ngeci kesi njipwe muka-kufuka, nambe kupwa muka-kuutwa, njane vyakulya vije vinanjipande.

⁹ Nga njikakala na vyuma vyavingi, amo kunjikakuzeme, oloni nga njipwa kautu, amo njikaiva, nakukuzivisa shwamwa yove Njambi yange.

¹⁰ Kesi ufweyele ngamba kuli shukulu yendi, kutewa akakusinga, co ukamona tuyando.

¹¹ Kuli vanu vamo vakasingi vaishavo, co kuvesi kushangala vainavo.

¹² Kuli vanu vamo vakaliyongola ngeci vanapu vakujela, oloni kuvalijelesele ku mazilo avo.

¹³ Kuli vanu vamo vakaliyongola ngeci vanapu vavavwa manene, eyo, valiyongola ngeci vanapu vavavwa!

¹⁴ Kuli vanu vamo vali na mayo akufwa ngwe mikwale, na mavundi avo ngwe vimoko ngeci valye vaka-kuutwa nakuvatundisa ano asi, nakutundisa vaka-kuyanda akati ka vanu.

¹⁵ Lishunju wakala na vana vendi vavali va vanakazi, mazina avo, “Njane!” Kuli vyuma viwana vije kuvyesi kukuta vikevyo evi,

¹⁶ vukalo vwa vatsi, limo lya mumba, livu lyakuma, na tuhya twakuzima.

¹⁷ Munu woshe uje ashendumuna ishe, nambe kujeneka kwononoka vaina, napande kuliwa ku makuvi nambe makololo kumucakuvula mesho endi.

¹⁸ Kuli vyuma lalo viwana vije vyavikalu kuli yange kuvizivisisa,

¹⁹ ngila yakapulula ngonga a mukambwila, muvuva wa linyoka a mamanya, ngila ya vwato vwakama ya a mema a kalunga, ngila yakulizema mukwenje na mumbanda.

²⁰ Munakazi muka-kulinga vupangala akendeka ngwendi, “Kulimona na munalume weka cinapu ngwe kulya vyakulya.”

²¹ Kuvili vyuma viwana vije vikajajesa lifuti,

²² ndungo uje emuka kupwa mwene, cilema uje alya vyoshe awana,

²³ munakazi uje vanayengula oloni ashomboka, na ngamba wa mumbanda omo ahinga mu mwela wa shukulu yendi wa munakazi.

²⁴ Kuli tusitu vavandondo vawana muno mu kaye, oloni vakunyanyama manene.

²⁵ Mishwa, vapwa va nzili, oloni vakalitulikila vyakulya vyavo mu simbu ya ndombo.

²⁶ Mashea, na vakevo kuvesi na nzili, oloni vakatungila membo avo mukati ka mamanya.

²⁷ Vimbimba, kuvakele na mwene, oloni vakende mu mukana.

²⁸ Misanga, wasa kukwata umo mu livoko lyove, oloni wasa kuvawana na mu mapela.

²⁹ Kuli vyuma viwana vije vikomokesa akuvikenga omo vyenda,

³⁰ vindumba, vapwa va nzili manene, kutuvakana tusitu voshe, co kuvesi kutewa cuma nacimo cai.

³¹ Vimembe, na vindemba, na vimyene vaje venda kulutwe lwa vanu vavo.

³² Nga ulinga vulema mu kulyalesa, nakutumba vutumbe vwavuvi, likele, co yongola!

³³ Nga ukucwangeya mavele, co kutunda mazi, nga upupa a lijulu lya mukweni, co anokola, nga ukala na matoto, co ukala mu vukalu.