Visimo 3 - Livulu lya Shukulu Kalunga

Kunangula vakwenje

¹ Munange, kesi wivale vilongesa vyange. Simbu yoshe mbunge yove inapande kunyunga mashiko ange.

² Nga ulingamo, vikakukwasa kuyoya myaka yaingi, vikakwana kuyoya kwa kwoloka.

³ Kesi wivale cizemo na kulongwa. Vikutiiye mu mukoshi wove, visoneke mu mbunge yove.

⁴ Nga ulingamo, Njambi na vanu vakakusingimika, co ukakala na lizina lyalivwa.

⁵ Kulaela kuli Shukulu Kalunga na mbunge yove yoshe. Kesi ujendamene ku mana ove vavenya.

⁶ Simbu yoshe tava Shukulu Kalunga ngeci akutwamenene, co akakumwesa vingila vya vushunga.

⁷ Kesi ulimone ngwe u muka-mana embwe, oloni komoka Shukulu Kalunga, tunda ku vuvi.

⁸ Muvila wove ukakala mwamuvwa na nzili.

⁹ Singimika Shukulu Kalunga akumulambwila vyuma vyoshe vyavivwa vije viwukateja mu lihya lyove.

¹⁰ Co vishete vyove vikashula na vimbuto, ukakala na vinyu vyavingi vije kuukawana naa akuvyaka.

¹¹ Munange, kesi uyeluwise kushungamesa kwa Shukulu Kalunga, kesi uvyane kunangula kwendi.

¹² Omwo Shukulu Kalunga akashungamesa vaje vaazema, ngwe muje cisemi mwakashungamesa mwana uje yavwaelela muli ikeye.

¹³ Vavezika vanu vaje vawana mana, vaje vawana kuzivisisa.

¹⁴ Kukala na mana kunatuvakana kukala na vimbongo, kukala nao kucilyeseka kukala na ngolinde.

¹⁵ Mana ali na seo yakama kutuvakana mamanya a seo, navimo vyai viwushaka vilyeseka na mana.

¹⁶ Mana akeo akuyoyesa matangwa amangi, akwana lalo vufuko na kasingimiko.

¹⁷ Akeo akuvwaelelesa mukuyoya kwove, co lalo akutwamenena mu kwoloka.

¹⁸ Mana anapu ngwe muti wa mwonyo, nsina yakuvwaelela kwa voshe vaje vauvumbatela.

¹⁹ Shukulu Kalunga watangele kaye na mana endi, mukuzivuka kwendi waakele lilu mu mwela walyo.

²⁰ Mana endi alingisile mema amangi ngeci alyangunuke, na mashelwa kunyokesa nyonzi ano asi.

²¹ Munange, nyunga mana ove nakuzivuka kwove kwakuvwa. Kesi vitunde muli yove.

²² Evi vikakwana mwonyo, mwonyo wauvwa ngwe sungu.

²³ Asinoni ukenda nakundikangela mu ngila yove, co kuukatanuka.

²⁴ Kuukazivi lyova omo uya a vulili nakulala, ukalala mwamuvwa vutsiki vwoshe.

²⁵ Kesi ulishoshomwene a tuyando twa cishitumukila, tuje tukaija a vaka-vuvi ngwe lihunzi lyakama.

²⁶ Shukulu Kalunga akapwa cinyangavili cove. Kakakwecelela ngeci utse mu mweto.

²⁷ Kesi uvindike vuvwa vwa vaje vanavupande, nameme nzili yakulinga cije ulinaco.

²⁸ Kesi uleke mundambo wove ngwove, “Ya kwimbo, ija imene njakukwane,” omo cuma cije cashaka yove ulinaco.

²⁹ Kesi utumbile mundambo wove vutumbe vwakumuvulumuna, ikeye wayoya nove mu kwoloka, wakukulaela.

³⁰ Kesi ulinge vimata na munu kwakujeneka kashwilo nga kakuvulumwine.

³¹ Kesi uliveyele vaka-muuka nambe kwangula kukava vingila vyavo,

³² omwo Shukulu Kalunga wazinda vaka-kulinga vuvi, wakulaela vaka-kushungama.

³³ Cisingo ca Shukulu Kalunga cakala a njuvo ya muka-vuvi, oloni akavezikisa membo a vaka-vushunga.

³⁴ Shukulu Kalunga akayeluwisa vaje vamuyeluwisa, amwesa cizemo kuli vaka-kulikeesa.

³⁵ Vaka-mana vakashwana kasingimiko, oloni vilema vakaziva shwamwa.